مىرزاحمەتوۆتەن اسا ءىرى مولشەردە پارا العان: ەكس- ۆيسە- مينيستر ۇستالدى

استانا. قازاقپارات - 7 -ماۋسىمدا سىبايلاس جەمقورلىققا قارسى قىزمەت جاسىرىن ءىس- شارالار كەشەنىنىڭ ناتيجەسىندە ەكس- ۆيتسە- مينيستر نۇرجان باۋىرجان ۇلى التايەۆتى اسا اۋىر جەمقورلىق قىلمىس جاسادى دەگەن كۇدىك بويىنشا ۇستادى، دەپ حابارلايدى قازاقپارات.

ن. ب. التايەۆ ەڭبەك جانە الەۋمەتتىك قورعاۋ ۆيتسە- ءمينيسترى، كەيىننەن ق ر پارلامەنتى ءماجىلىسىنىڭ دەپۋتاتى رەتىندە جۇيەلى نەگىزدە «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ابىلاي مىرزاحمەتوۆتەن اسا ءىرى مولشەردە پارا الدى دەپ كۇدىكتەنەدى.

2018-2020 -جىلدارى جاۋاپتى مەملەكەتتىك لاۋازىمداردى اتقارا وتىرىپ، ول ا. ي. مىرزاحمەتوۆتىڭ مۇددەسى ءۇشىن ارەكەت ەتىپ، ونىڭ ۇيىمىنا مەملەكەتتىك تاپسىرىستاردى الۋىنا ىقپال ەتىپ، جالپى قامقورشىلىق كورسەتكەن.

ن. ب. التايەۆ استانا قالاسى پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى. تەرگەۋ جالعاسۋدا.

ق ر ق پ ك 201-بابىنا سايكەس تەرگەۋ مۇددەسى ءۇشىن وزگە اقپارات جاريا ەتۋگە جاتپايدى.