قازاقستاندىق تەننيسشى الەمدىك رەيتينگىدە توپ-ۇشتىككە ەندى

استانا. قازاقپارات - قازاقستاننىڭ ءبىرىنشى راكەتكاسى ەلەنا رىباكينا الداعى دۇيسەنبىدە جاڭارتىلاتىن الەمدىك رەيتينگىدە ۇزدىك ۇشتىككە ەنەدى، دەپ حابارلايدى قازاقپارات ءتىلشىسى.

قازاقستاندىق تەننيسشى WTA Live رەيتينگىسىندە قازىر 4-تەن 3-ورىنعا كوتەرىلىپ تۇر.

رولان گارروس ءتۋرنيرىنىڭ قورىتىندىسى بويىنشا ە. رىباكينانىڭ الدىنا الەمنىڭ 7-راكەتكاسى، تۋنيستىك تەننيسشى ونس جابەر شىعۋى مۇمكىن ەدى. الايدا ول شيرەك فينالدا الەمنىڭ 14-راكەتكاسى، برازيليالىق بەاتريس حادداد ماياعا جول بەردى - 6:3، 6:7 (5:7)، 1:6.

وسىلايشا، ەلەنا رىباكينا پولشا وكىلى يگا شۆەنتەك پەن بەلارۋس وكىلى ارينا سوبولەنكودان كەيىنگى ءۇشىنشى ساتىعا كوتەرىلمەك.

قازاقستان تەننيس فەدەراتسياسىنىڭ باسپا ءسوز قىزمەتى مالىمەتتى راستاپ، ە. رىباكينانىڭ رەسمي تۇردە الداعى دۇيسەنبىدە الەمنىڭ ءۇشىنشى راكەتكاسى اتاناتىنىن جەتكىزدى.

ەسكە سالا كەتەيىك، بۇدان بۇرىن قازاقستاندىق جاس تەننيسشىنىڭ گرۋزيادا وتكەن جارىستىڭ ابسوليۋتتى چەمپيونى اتانعانىن جازعان بولاتىنبىز.