پرەزيدەنت توقايەۆ قاتار ءامىرى باستاعان دەلەگاتسيامەن كەزدەستى

استانا. قازاقپارات - مەملەكەت باسشىسى قاسىم- جومارت توقايەۆ قاتار ءامىرى شەيح ءتاميم بەن حاماد ءال ءتاني باستاعان دەلەگاتسيامەن كەزدەستى، دەپ حابارلايدى قازاقپارات اقورداعا سىلتەمە جاساپ.

پرەزيدەنت قاسىم-جومارت توقايەۆ شەيح ءتاميم بەن حاماد ءال تانيگە ءىلتيپات بىلدىرە وتىرىپ، استانا حالىقارالىق فورۋمىنا قاتار ۇكىمەتى مەن بيزنەس وكىلدەرىن باستاپ كەلگەنى ءۇشىن العىس ايتتى.

مەملەكەت باسشىسى قاتار قازاقستاننىڭ تاياۋ شىعىستاعى ماڭىزدى ءارى سەنىمدى سەرىكتەسى ەكەنىن اتاپ ءوتىپ، بۇگىنگى كەلىسسوزدەر ەكى ەل اراسىنداعى ىنتىماقتاستى ودان ءارى دامىتۋعا تىڭ سەرپىن بەرەتىنىنە سەنىم ءبىلدىردى.

«تاياۋ ارادا ەكى ەل اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولادى. بۇل - ەرەكشە مەرەيلى بەلەس. وسى كەزەڭدە ءبىز ءتيىمدى مەملەكەتارالىق ىنتىماقتاستىققا قول جەتكىزدىك. سىندارلى ساياسي ديالوگ قۇردىق. بىلتىر ءسىز ەلىمىزگە مەملەكەتتىك ساپارمەن كەلدىڭىز. سونداي-اق جۋىردا قازاقستان پرەمەر-ءمينيسترى قاتارعا ساپارمەن بارىپ كەلدى. بۇل - ءداستۇرلى دوستىق پەن بەرىك ارىپتەستىكتىڭ ايقىن دالەلى. ءسىز مەملەكەتتەرىمىزدىڭ اراسىنداعى ىقپالداستىقتى تەرەڭدەتۋگە زور ۇلەس قوسىپ كەلەسىز. مەن مۇنى جوعارى باعالايمىن. قازاق-قاتار بايلانىستارىن نىعايتۋ ءۇشىن سىزبەن بىرلەسە ارەكەت ەتۋگە ءاردايىم دايىنمىن. قاتار ينۆەستورلارىنا بارىنشا قولداۋ كورسەتىپ، قولايلى جاعداي جاسايمىز»، - دەدى مەملەكەت باسشىسى.

مەملەكەت باسشىسىنىڭ ايتۋىنشا، قازاقستان قاتارعا جالپى قۇنى 250 ميلليون دوللار بولاتىن 60 قا جۋىق ءونىم ءتۇرىنىڭ ەكسپورتىن ارتتىرۋعا دايىن. سونداي-اق ىسكەرلىك بايلانىستاردى نىعايتۋ ءۇشىن ەكى ەل اراسىندا تىكەلەي اۋە قاتىناستارىن اشۋ ماڭىزدى.

ءوز كەزەگىندە قاتار ءامىرى شەيح ءتاميم بەن حاماد ءال ءتاني قۇرمەت كورسەتكەنى ءۇشىن پرەزيدەنت قاسىم-جومارت توقايەۆقا ريزاشىلىعىن ءبىلدىردى.

«استانا حالىقارالىق فورۋمىنا شاقىرۋىڭىزدى قابىل الىپ، قازاقستانعا كەلىپ وتىرمىن. بۇل - مەن ءۇشىن زور قۇرمەت. بىلتىر قازان ايىندا قازاقستاندا كەزدەسكەننەن كەيىن تاعى دا جۇزدەسىپ وتىرعانىما قۋانىشتىمىن. بۇل - بىلتىرعى كەلىسسوزدەر بارىسىندا باۋىرلاس قازاقستانمەن اراداعى قول جەتكىزىلگەن ۋاعدالاستىقتاردىڭ جۇزەگە اسىرىلۋىن پىسىقتاۋعا تاعى ءبىر مۇمكىندىك. مەنىمەن بىرگە قاتاردىڭ ىسكەر توپتارىنان قۇرالعان ۇلكەن دەلەگاتسيا كەلدى. بۇل ەكى ەلدىڭ اراسىنداعى ىنتىماقتاستىقتىڭ تابىستى بولۋىنا جول اشادى دەپ ويلايمىن. ءتۇرلى سالاداعى ەكىجاقتى قارىم-قاتىناس قارقىندى دامىپ كەلەدى. ءبىز باسقا دا باعىتتارداعى ىنتىماقتاستىقتىڭ اۋقىمىن كەڭەيتۋگە نيەتتىمىز»، - دەدى شەيح ءتاميم بەن حاماد ءال ءتاني.

كەزدەسۋ بارىسىندا تاراپتار ەلىمىزدىڭ قاتار ينۆەستورلارىمەن مۇناي-گاز، تاۋ-كەن جانە مەتاللۋرگيا، اۋىل شارۋاشىلىعى، مەديتسينا، قارجى سالالارىنداعى بىرلەسكەن جوبالاردى جۇزەگە اسىرۋ پەرسپەكتيۆالارىن تالقىلادى. سونداي-اق حالىقارالىق ۇيىمدار اياسىنداعى ءوزارا ءتيىمدى ىنتىماقتاستىق ماسەلەلەرىن قاراستىردى.

ەسكە سالايىق، بۇگىن ق. توقايەۆ قاتار ءامىرىن استانا اۋەجايىندا قارسى الدى. شەيح ءتاميم بەن حاماد ءال ءتاني استانا حالىقارالىق فورۋمىنا قاتىسادى.