اكتيۆتەردى قايتارۋ قالاي جۇزەگە اسىرىلادى: ءماجىلىس قۇجاتتى ماقۇلدادى

استانا. قازاقپارات - بۇگىن ءماجىلىستىڭ جالپى وتىرىسىندا «زاڭسىز الىنعان اكتيۆتەردى مەملەكەتكە قايتارۋ تۋرالى» زاڭ جوباسى مەن ىلەسپە قۇجاتتار ءبىرىنشى وقىلىمدا ماقۇلداندى.

زاڭ جوباسى اياسىندا ارنايى ۋاكىلەتتى ورگان مەن كوميسسيا قۇرىلادى، زاڭدى جانە جەكە تۇلعالاردىڭ جابىق رەەسترى جاسالىنىپ، مەملەكەتتىك قور جاساقتالادى.

«زاڭ جوباسىندا ارناۋلى مەملەكەتتىك قور مەن باسقارۋشى كومپانيانىڭ قىزمەتى رەگلامەنتتەلگەن. ارنايى مەملەكەتتىك قور - قايتارىلعان اكتيۆتەردى جيناقتاۋ جانە وتكىزۋ ءۇشىن قازىناشىلىق ورگاندارىندا اشىلعان ۇكىمەتتىڭ قولما-قول اقشاسىن باقىلاۋ شوتى. باسقارۋشى كومپانيانىڭ مىندەتى - مەملەكەت اتىنان وزىنە قايتارىلعان اكتيۆتەردى مەنشىككە قابىلداۋ مەن زاڭدى باسقارۋ، قاراجاتتى ارنايى مەملەكەتتىك قورعا اۋدارۋدى قامتاماسىز ەتۋ»، - دەدى ءماجىلىس دەپۋتاتى ەلنۇر بەيسەنبايەۆ.

زاڭ جوباسىن ىسكە اسىرۋ ءۇشىن تۇزەتۋلەردى كوزدەيتىن ءتورت ىلەسپە قۇجات ازىرلەندى.

اكتيۆتەردى قايتارۋعا باعىتتالعان شارالار جەكە تۇلعالارمەن تىعىز بايلانىستا بولعان، زاڭسىز سىبايلاستىق ورناتقان وزگە تۇلعالارعا دا قولدانىلادى.

«ماسەلەن، جاقىن تۋىستارى، تانىستارى، كولىك جۇرگىزۋشىسى، قىزمەتشىسى جانە ولاردىڭ مۇلكىنە نومينالدى يەلىك ەتەتىن ادامدار جاتادى. وسى رەتتە اتالعان زاڭ جوباسى ءىرى سىبايلاس جەمقورلىققا جانە رەسپۋبليكالىق، جەرگىلىكتى دەڭگەيدەگى اكىمشىلىك- بيلىكپەن بىتە قايناسقان وليگوپوليالىق توپتارعا قارسى پارمەندى شارالار ەنگىزەدى»، - دەدى ەلنۇر بەيسەنبايەۆ.

قۇجاتتا شەت ەلدەردەگى اكتيۆتەردى قايتارۋ بويىنشا جۇمىستى زاڭ اياسىندا جۇرگىزۋ تەتىكتەرى قاراستىرىلعان.

زاڭ جوباسىندا اكتيۆتەردى قايتارۋدىڭ ەرىكتى نەمەسە ءماجبۇرلى ءتارتىبى كوزدەلگەن. بىرىنشىدەن، ەرىكتى تۇردە قايتارۋ - وزدەرىنە تيەسىلى مۇلىكتى مەملەكەتكە وتەۋسىز بەرۋ جولىمەن جۇزەگە اسىرىلادى. ەكىنشىدەن، سوتتاردىڭ شەشىمدەرى نەگىزىندە قىلمىستىق پروتسەسس اياسىندا زاڭسىز الىنعان اكتيۆتەردى تاركىلەۋ قاراستىرىلىپ وتىر.

زاڭ جوباسىندا ازاماتتىق پروتسەسس اياسىندا تاركىلەۋدىڭ مىناداي الگوريتمى ەسكەرىلگەن:

ءبىرىنشى. ەگەر مونيتورينگ جانە اقپاراتتى تالداۋ قورىتىندىلارى بويىنشا قۇنى 100 ميلليون ا ق ش دوللارىنان اساتىن اكتيۆتى ساتىپ الۋدىڭ زاڭدىلىعىنا بايلانىستى كۇمان بولسا، ۋاكىلەتتى ورگان سۋبەكتىنى جانە ونىڭ ۇلەستەس تۇلعالارىن رەەسترگە ەنگىزۋ ماسەلەسىن كوميسسيانىڭ قاراۋىنا شىعارادى.

ەكىنشى. ماتەريالداردى قاراۋ قورىتىندىلارى بويىنشا كوميسسيا ادامدى رەەسترگە ەنگىزۋ نەمەسە قوسپاۋ تۋرالى ۇسىنىس بەرەدى.

ءۇشىنشى. ۋاكىلەتتى ورگان رەەسترگە ەنگەن ازاماتتارعا ولاردىڭ اكتيۆتەرى تۋرالى دەكلاراتسيانى تاپسىرۋ قۇقىعىنىڭ بار ەكەنىن جەتكىزەدى. دەكلاراتسيالاردى تەكسەرەدى جانە تەكسەرۋ ناتيجەلەرىن كوميسسيانىڭ قاراۋىنا شىعارادى. سونىڭ ناتيجەسىندە، كوميسسيا ودان ءارى شارالار قابىلداۋ تۋرالى ۇسىنىمدار شىعارادى.

«ەگەر ادام دەكلاراتسيانى تاپسىرۋ ارقىلى ءوز اكتيۆتەرىن قايدان العانىن راستاي الماسا نەمەسە دەكلاراتسيانى تابىس ەتپەسە، مۇنداي اكتيۆتەر نەگىزسىز بايلىق رەتىندە تانىلىپ، مەملەكەت كىرىسىنە قايتارىلۋى مۇمكىن. ادامداردىڭ قۇقىعىن قورعاۋعا، اشىق پروتسەسكە كەپىلدىك بەرۋ جانە ازاماتتىق قوعام جاعىنان باقىلاۋدى قامتاماسىز ەتۋ ماقساتىندا زاڭ جوباسىندا ءتيىستى قادامدار ەسكەرىلگەن. بۇل تۇرعىدا ادامداردىڭ جابىق رەەسترى جاسالادى، سەبەبى بۇل باعىتتا رەپۋتاتسيالىق ماسەلەلەر بار. سونىمەن قاتار، اتالعان كوميسسيانىڭ ماسەلەنى القالى تارتىپتە قاراۋى ەسكەرىلگەن. كوميسسياعا دەپۋتاتتار مەن قوعام بەلسەندىلەرى مۇشە بولا الادى. اتاپ ايتقاندا، ادال ساتىپ الۋشىلار مەن ادال كرەديتورلاردىڭ قۇقىقتارى قورعالادى. جالپى، بارلىق ساتىلاردا سوتقا شاعىمدانۋ مۇمكىندىگى بار، سونداي- اق كەلىسىم تالاپتارىن ورىنداعان ادامدار ءۇشىن كەپىلدىكتەر بەرىلەدى»، - دەدى ەلنۇر بەيسەنبايەۆ.