كوشە جابىلسا، سۋ كەلەدى دەپ ءتۇسىنۋ قاتە: استانا اكىمدىگى تۇرعىنداردى سابىرعا شاقىردى
«قۇرمەتتى دوستار! قالا تۇرعىندارى! وسى ايدىڭ سوڭىنا دەيىن اۋىز سۋ تاپشىلىعى قالادا شەشىلەدى. دەگەنمەن، ءدال قازىرگى ۋاقىتتا كەيبىر تۇرعىن ۇيلەردە سۋدىڭ ازدىعى شامادان تىس قاتتى بايقالىپ جاتقانىن ءتۇسىنىپ وتىرمىز. بۇنداي ۇيلەردىڭ ماسەلەسىن «استانا سۋ ارناسى» جانە اۋداندىق اكىمدىكتەر بىرلەسىپ شەشۋدە. كەيبىر جەرلەردە ءۇيدىڭ ناسوستارى قايتا بەكىتىلىپ، سونىڭ ارقاسىندا سۋدىڭ اعىسى كۇشەيتىلىپ جاتىر. ءبىراق ول بارلىق جاعدايدا بىردەي كومەكتەسە بەرمەيدى.
دەگەنمەن، «استانا سۋ ارناسى» بارلىق تۇرعىن ۇيلەرگە تەڭدەي قاراپ، سۋ تاپشىلىعىن شەشۋگە تىرىسۋدا. ءبىراق، وكىنىشكە قاراي، سۋ قويمالارىندا سۋ دەڭگەيى قاتتى تومەندەپ كەتكەن كەزدە، ولار سۋدى تولتىرىپ العانشا قالاداعى اعىستى ازايتۋعا ءماجبۇر. ادەتتە بۇل تۇننەن تاڭعا دەيىن جالعاسادى. بۇنداي كەزدە سابىردان باسقا ەشتەڭە كومەكتەسە المايتىنى تاعى انىق.
سول سەبەپتى قالىپتاسقان جاعدايعا تۇسىنۋشىلىكپەن قاراپ، زاڭعا قايشى ارەكەتتەردەن اۋلاق بولۋعا شاقىرامىز. كوشە جابىلسا، سۋ كەلەدى ەكەن دەپ ءتۇسىنۋ قاتە. ەسەسىنە، زاڭعا قايشى ارەكەت، باسقا ازاماتتاردىڭ ەركىنە نۇقسان كەلتىرىپ، جول-كولىك اپاتىنا اكەلۋى ىقتيمال. سول سەبەپتى، قالىپتاسقان جاعدايدا وزگە تۇرعىندار سەكىلدى زاڭ اياسىندا بىرلەسىپ جۇمىس جاساۋعا شاقىرامىز. ءاربىر ارىز-شاعىم تولىق قارالادى، ماماندار سىزگە مىندەتتى تۇردە كومەكتەسەدى»، - دەلىنگەن استانا قالاسى ىشكى ساياسات باسقارماسىنىڭ باسشىسى داۋرەن بابامۇراتوۆتىڭ ۆيدەوۇندەۋىندە.
اكىمدىكتەن ەسكە سالىپ وتكەندەي، سۋ تاپشىلىعى 2021-جىلى قۇرىلىسى باستالعان سۋ تازالاۋ ستانسياسى ىسكە قوسىلعان كەزدە، ياعني 30- ماۋسىمنان كەيىن تولىققاندى شەشىلەدى.
«سونىمەن قاتار كەلەسى اپتادا استانا سۋ قويماسىنان تاعى ءبىر قۇبىر سۋ ستانتسياسىنا جىبەرىلەدى. بۇل دا سۋ تاپشىلىعىنىڭ شەشىلۋىنە كومەكتەسەدى»، - دەدى داۋرەن بابامۇراتوۆ.
ەسكە سالايىق، بۇگىن مەملەكەت باسشىسى قاسىم-جومارت توقايەۆ ەلوردانى سۋمەن قامتاماسىز ەتۋ تۋرالى قالا اكىمى جەڭىس قاسىمبەكتىڭ بايانداماسىن تىڭدادى. كەشە جەڭىس قاسىمبەك تە استانا تۇرعىندارىنا ۆيدەوۇندەۋ جاساپ، سۋ تاپشىلىعى ماسەلەسى جۋىق ارادا شەشىلەتىنىنە ۋادە بەرگەن ەدى.