ەكس- ماجىلىسمەن نۇرجان التايەۆ پارا الدى دەگەن كۇدىكپەن ۇستالدى

استانا. قازاقپارات - پارا الدى دەگەن كۇدىكپەن ءماجىلىستىڭ ەكس- دەپۋتاتى نۇرجان التايەۆ ۇستالدى. بۇل اقپاراتتى سىبايلاس جەمقورلىققا قارسى ءىس- قيمىل اگەنتتىگىنەن راستادى، دەپ حابارلايدى قازاقپارات ءتىلشىسى.

«ءيا، ونىڭ (نۇرجان التايەۆ - اۆتور تۇسىندىرمەسى) اسا ءىرى مولشەردە پارا الدى دەگەن كۇدىكپەن ۇستالعانىن راستايمىز. ق ر قىلمىستىق ءىس جۇرگىزۋ كودەكسىنىڭ 201-بابىنا سايكەس، بۇل وقيعاعا قاتىستى وزگە اقپارات جاريا ەتىلمەيدى»، - دەپ جاۋاپ بەردى سىبايلاس جەمقورلىققا قارسى ءىس- قيمىل اگەنتتىگىنىڭ رەسمي وكىلى ارمان تىلەۋكەنوۆ.

ەسكە سالا كەتەيىك، 2020 -جىلى نۇرجان التايەۆ سول كەزدەگى «Nur Otan» پارتياسىنىڭ قاتارىنان شىعارىلىپ، ونىڭ دەپۋتاتتىق وكىلەتتىگى توقتاتىلعان بولاتىن.

كەيىن ول پرەزيدەنت سايلاۋىنا قاتىسۋعا نيەت ءبىلدىردى. دەگەنمەن ونى ۇسىنعان «مۇقالماس» بىرلەستىگى نۇرجان التايەۆتىڭ سايلاۋعا تۇسۋىنە قارسىلىق ءبىلدىرىپ، سوتقا جۇگىندى. وسىدان كەيىن ول سايلاۋعا قاتىسۋعا جىبەرىلمەدى.