قازاقستاندىق ينۆەستورلارعا جاڭا مۇمكىندىك: ابۋ دابي قور بيرجاسىمەن كەلىسىم جاسالدى
تاراپتار Tabadul پلاتفورماسى ارقىلى ينۆەستورلار ءۇشىن بيرجانىڭ قولجەتىمدى بولاتىندىعىنا ۋاعدالاستى، دەپ حابارلايدى قازاقپارات ءتىلشىسى.
«ستراتەگيالىق ماقساتىمىزدىڭ ءبىرى - حالىقارالىق ەكسپەرتيزا مەن حالىقارىلىق قور نارىعىنىڭ مادەنيەتىن قازاقستانعا اكەلۋ جانە شەتەلدىك ينۆەستورلاردى تارتۋ. بۇگىنگى جاسالعان كەلىسىم وتاندىق ينۆەستورلارعا جاڭا مۇمكىندىكتەر بەرەدى. ياعني نارىققا قاتىسۋشىلار ءۇشىن مۇمكىندىكتەر اياسى كەڭەيەدى. جەكە ينۆەستورلار ليتسەنزياسى بار بروكەرلەر ارقىلى ەكى بيرجادا دا ساۋدا جاساي الادى. ADX پەن ساۋدا قاتىناسى ءبىزدىڭ ماقساتىمىزعا ساي كەلەدى. سونىمەن قاتار اتالعان كەلىسىم اياسىندا قازاقستان مەن پارسى ەلدەرى نارىعى اراسىنداعى بايلانىس نىعايا تۇسپەك»، - دەدى AIX باسقارما ءتوراعاسىنىڭ مىندەتىن اتقارۋشى اسەل مۇقاجانوۆا «Astana Finance Days» كونفەرەنتسياسى بارىسىندا.
ۇيىمداستىرۋشىلار ۇسىنعان مالىمەتكە سايكەس، ADX وتكەن جىلى شىلدەدە ساۋدا- ساتتىققا ءوزارا قول جەتكىزۋ مودەلىنە نەگىزدەلگەن تسيفرلىق بيرجانىڭ العاشقى وڭىرلىك ورتالىعى - Tabadul Hub-تى ىسكە قوستى.
Tabadul - مۇشە بيرجالار اراسىنداعى وڭىرلىك جانە جاھاندىق دەڭگەيدە ساۋدا جاساۋعا ارنالعان تسيفرلىق بيرجا الاڭى. جالپى، Tabadul - ءوزارا ساۋدا- ساتتىق مۇمكىندىگىن قامتاماسىز ەتە وتىرىپ، قاتىسۋشى بيرجا نارىعىندا ىنتىماقتاستىقتى نىعايتىپ، وتىمدىلىكتى ارتتىرۋعا باعىتتالعان.
ەسكە سالساق، بيىل قاڭتاردا مەملەكەت باسشىسى قاسىم- جومارت توقايەۆ رەسمي ساپارمەن بىرىككەن اراب امىرلىكتەرىنە بارعان ەدى.
ساپار اياسىندا قاسىم- جومارت توقايەۆ ءباا پرەزيدەنتى شەيح مۇحاممەد بەن زايد ءال ناحايانمەن كەلىسسوز جۇرگىزدى. ەكى ەل باسشىلارى قازاقستان مەن امىرلىك اراسىنداعى ستراتەگيالىق سەرىكتەستىكتى دامىتۋ پەرسپەكتيۆالارىن، سونداي- اق ماڭىزدى سالالارداعى ساۋدا- ەكونوميكالىق جانە ينۆەستيتسيالىق ىنتىماقتاستىقتى نىعايتۋ ماسەلەلەرىن تالقىلادى.
ايتا كەتەيىك، ەلوردادا قارجى سالاسىنداعى ءىرى وقيعالاردىڭ ءبىرى - «Astana Finance Days 2023» كونفەرەنتسياسى ءوتىپ جاتىر.
اتالعان شارا 2018 -جىلدان بەرى ۇيىمداستىرىلىپ كەلەدى. وندا وتاندىق جانە الەمدىك قارجى سالالارىنىڭ وزەكتى ماسەلەلەرى، ۇردىستەرى مەن مۇمكىندىكتەرى تالقىلانۋدا.