ماۋسىمنىڭ اياعىندا قىزىلوردادا كۇرىش جارمەڭكەسى وتەدى

استانا. قازاقپارات - قىزىلوردا وبلىسىنىڭ اكىمى نۇرلىبەك نالىبايەۆ ورتالىق كوممۋنيكاتسيالار قىزمەتىندە وتكەن بريفينگىدە كۇرىش باعاسىنىڭ قىمباتتاۋىنا تۇسىنىك ءبىلدىردى، دەپ حابارلايدى قازاقپارات ءتىلشىسى.

«وزدەرىڭىز جاقسى بىلەسىزدەر. كۇرىشكە قاجەتتى تەحنيكالاردىڭ باعاسى قازىر قىمباتتاپ جاتىر. وعان جۇمسايتىن جانار- جاعارمايدىڭ دا، قۇرال- جابدىقتىڭ دا باعاسى ارتۋدا. ونىڭ ۇستىنە قازىر بۇكىل جەردە جالاقى كوتەرىلىپ جاتىر. كۇرىش سالاسىندا جۇمىس ىستەپ جۇرگەن ەڭبەك ادامدارىنىڭ دا جالاقىسى جوعارىلاۋدا. مۇنىڭ ءبارى سايىپ كەلگەندە، كۇرىش باعاسىنىڭ وسۋىنە اكەلەدى. دەگەنمەن، ءبىز مۇنى باقىلاۋدا ۇستاپ، جۇمىس ىستەپ جاتىرمىز. ءوزىڭىز ايتقانداي، تەكسەرۋ بولدى. شىنىندا 6-7 كاسىپورىندا وسىنداي دەرەكتەر انىقتالدى. وعان بايلانىستى 100 ميلليون تەڭگەگە جۋىق ايىپپۇلدار سالىندى. ولار الداعى ۋاقىتتا كۇرىش باعاسىن سەبەپسىز وسىرمەيتىن بولادى. ءبىز ونى باقىلاۋدا ۇستاپ وتىرمىز. قازىرگى تاڭدا ءبىر كەلى كۇرىش باعاسى 400 تەڭگەدەن اسىپ كەتتى. ءبىراق ۇكىمەت باسشىسىنىڭ تاپسىرماسى بويىنشا ءوزىمىزدىڭ باسقا ارىپتەستەرگە، وڭىرلەرگە قولداۋ كورسەتىپ جاتىرمىز»، - دەدى ايماق باسشىسى.

وسىنداي قولداۋ اياسىندا وڭىرلەر كۇرىشتىڭ ءبىر كەلىسىن 380 تەڭگەدەن ساتىپ الۋعا مۇمكىندىك العان.

«بىرنەشە ءوڭىر ءبىزدىڭ كاسىپورىندارمەن كەلىسىمشارتقا وتىردى. ءبىز ولارعا كۇرىشتىڭ ءبىر كەلىسىن 380 تەڭگەدەن بوساتىپ جاتىرمىز. ەندى الداعى ماۋسىم ايىنىڭ 23-25 ىندە ۇلكەن كۇرىش جارمەڭكەسى وتەدى. سول جارمەڭكەگە دە ارىپتەستەرىمىزدى شاقىرىپ جاتىرمىز. قازىردەن باستاپ بىزدەگى كۇرىش وندىرۋشىلەرمەن كەلىسىمشارتقا وتىرىپ، الداعى ۋاقىتتا ارزان باعامەن الۋعا بولادى. وعان كومەكتەسەمىز.

بۇل ماسەلەنىڭ ەكىنشى جاعىن دا قاراۋىمىز كەرەك. كۇرىشتىڭ باعاسى وسكەنى - ءبىر شەتىنەن شىعىنى مەن ەڭبەگى وتە كوپ. سول سالادا جۇمىس ىستەپ جۇرگەن ادامدار باعانىڭ شامالى بولسا دا وسكەنىن قالايدى»، - دەدى نۇرلىبەك نالىبايەۆ.