ۇلتتىق بانك ينفلياتسياعا بولجام جاسادى

استانا. قازاقپارات - ۇلتتىق بانك ءتوراعاسىنىڭ ورىنباسارى اقىلجان بايماعامبەتوۆ بازالىق ستاۆكاعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ءبىز بازالىق ستاۆكانى كوتەردىك، قازىر ونى 16,75 دەڭگەيىندە ۇستاپ وتىرمىز. ينفلياتسيا ءوسىمىنىڭ شارىقتاۋ شەگى بيىل اقپاندا تىركەلدى - 21,3 پايىز. قازىر ول بىرتىندەپ تومەندەپ جاتىر. ءبىز مامىردا بازالىق ستاۆكانى جاريالاعان كەزدە حالىقارالىق ينفلياتسيا %15,9 تومەندەدى. ياعني، ينفلياتسيا ودان ءارى تومەندەيدى. بيىل ينفلياتسيا 11 جانە 14 پايىز ارالىعىندا بولادى دەپ بولجام جاساپ وتىرمىز»، - دەدى اقىلجان بايماعامبەتوۆ Astana Finance Days كونفەرەنتسياسى بارىسىندا ب ا ق وكىلدەرىنىڭ ساۋالىنا.

ونىڭ ايتۋىنشا، ينفلياتسيا ءوسىمى نەمەسە تومەندەۋى ەلدەگى باعاعا بايلانىستى. اتاپ ايتقاندا، جانار- جاعارماي جانە كوممۋنالدىق قىزمەت باعاسىنا.

«ءبىز بازالىق ستاۆكانىڭ تىكەلەي اسەرىمەن كۇرەسپەيمىز. ءبىراق ينفلياتسيانىڭ قايتالاما اسەرىنە جول بەرمەۋدى مۇقيات قاداعالايمىز. ياعني ونىڭ كەڭ اۋقىمداعى تاۋارلار مەن قىزمەتتەردىڭ باعاسىنا قالاي اسەر ەتەتىنىن باقىلاۋدا ۇستايمىز. سونىڭ نەگىزىندە الداعى بازالىق ستاۆكاعا قاتىستى شەشىم قابىلدانادى» ، - دەيدى ول.