قانداستار مەن قونىس اۋدارۋشىلاردى قابىلدايتىن وڭىرلەر تىزبەسى قايتا قارالادى
مۇنداي باستامانى اشىق تالقىعا شىعارىلعان اۋىلداردى دامىتۋدىڭ 2023-2027 -جىلدارعا ارنالعان تۇجىرىمداما- جوباسىندا ۇلتتىق ەكونوميكا مينيسترلىگى كوتەرگەن، دەپ حابارلايدى قازاقپارات ءتىلشىسى.
«قانداستار مەن قونىس اۋدارۋشىلاردى قابىلدايتىن وڭىرلەردىڭ تىزبەسى قايتا قارالادى. اتاپ ايتقاندا، حالىق سانى كوپ ايماقتاردان ەڭبەك كۇشى تاپشى بولىپ وتىرعان شەكارا ماڭىنداعى اۋماقتارعا كوشىرۋ قاراستىرىلادى. ول كوشى- قون ساياساتىن ءتيىمدى ىسكە اسىرۋ ءۇشىن قاجەت. بۇل رەتتە قونىستاندىرۋ ايماقتارىنان اقمولا، اتىراۋ، باتىس قازاقستان وبلىستارىنىڭ الىنىپ تاستالعانى ەسكەرىلەدى»، - دەپ جازىلعان اشىق نقا پورتالىندا جاريالانعان تۇجىرىمدامادا.
ەسكە سالايىق، بۇعان دەيىن ەلىمىزدىڭ 7 شەكارالاس وڭىرىندەگى اۋىلداردىڭ حالىق سانى ازايىپ بارا جاتقانىن جازىپ ەدىك. حالىقتىڭ ۇدەرە كوشۋىنە تابىستىڭ تومەندىگى، جۇمىسسىزدىق، جول جانە ينجەنەرلىك ينفراقۇرىلىمنىڭ توزۋى سەبەپ بولىپ وتىر.
قوسا كەتسەك، شەكارا ماڭىنداعى كليماتى قاتال اۋىل تۇرعىندارىنىڭ 1 جىلدىق ەڭبەك ءوتىلى 1,5 جىل بولىپ ەسەپتەلمەك.
بۇدان بولەك، تابيعي- كليماتتىق جاعدايى كۇردەلى شەكارا ماڭىنداعى ەلدى مەكەندەر ءۇشىن ەلەكتر ەنەرگياسىنا تومەندەتىلگەن تاريف بەلگىلەنەدى. وسىنداي اۋىلداردا كاسىپكەرلىكتى قولداۋ ءۇشىن بيۋدجەت قاراجاتى ەسەبىنەن ميكروكرەديت پەن جوبالارعا كەپىلدىك بەرۋگە كۆوتا ءبولۋ دە جوسپارلانعان.