ادام قۇقىقتارى جونىندەگى ۋاكىل پرەزيدەنتكە اتقارعان جۇمىستارى جونىندە باياندادى

استانا. قازاقپارات - مەملەكەت باسشىسى قاسىم- جومارت توقايەۆ ادام قۇقىقتارى جونىندەگى ۋاكىل ارتۋر لاستايەۆتى قابىلدادى، دەپ حابارلايدى قازاقپارات اقورداعا سىلتەمە جاساپ.

قاسىم- جومارت توقايەۆقا ادام قۇقىقتارى جونىندەگى ۋاكىلدىڭ بيىلعى 5 ايدا اتقارعان جۇمىستارىنىڭ قورىتىندىسى، سونىڭ ىشىندە ازاماتتاردىڭ قۇقىقتارىن قايتا قالپىنا كەلتىرۋگە جاردەمدەسۋ ءۇشىن قابىلدانىپ جاتقان شارالار تۋرالى مالىمەت بەرىلدى. ومبۋدسمەن كەڭسەسى مەن ونىڭ وڭىرلەردەگى وكىلدىكتەرى وسى ۋاقىت ارالىعىندا ازاماتتاردىڭ 2318 ءوتىنىشىن قاراعان.

ارتۋر لاستايەۆتىڭ ايتۋىنشا، جەرگىلىكتى جەردەگى جۇمىستى كۇشەيتۋ ءۇشىن ۇلتتىق پريەۆەنتيۆتى مەحانيزم مۇشەلەرىنىڭ قۇرامى جاڭاردى. ادام قۇقىقتارى جونىندەگى ۋاكىل بالالارعا ارنالعان مەكەمەلەردەگى قاتىگەزدىك ارەكەتتەردىڭ الدىن الۋ ماسەلەسىن ەرەكشە نازاردا ۇستايدى. اتاپ ايتقاندا، ۋاكىل وسىنداي مەكەمەلەرگە 213 رەت بارىپ، 800 دەن استام ۇسىنىم جاساعان. ومبۋدسمەننىڭ باستاماسىمەن ازاپتاۋ فاكتىلەرىنە قاتىستى تەرگەۋ امالدارى جۇرگىزىلەدى. قۇقىق قورعاۋ ورگاندارىنا ءبىرقاتار ارنايى ۇسىنىم بەرىلدى.

كەزدەسۋ سوڭىندا قاسىم- جومارت توقايەۆ ءتيىستى مەملەكەتتىك ورگاندارمەن بىرلەسىپ، ازاماتتاردىڭ قۇقىقتارىن ءتيىمدى قورعاۋدى قامتاماسىز ەتۋ ماڭىزدى ەكەنىن ايتتى.