شەكارا ماڭىنداعى اۋىل تۇرعىندارىنا جەر ۋچاسكەسى وتەۋسىز نەگىزدە بەرىلمەك

استانا. قازاقپارات - يندۋستريالىق- يننوۆاتسيالىق دامۋ سالاسىنداعى ۋاكىلەتتى ورگان «وتباسى بانكىمەن» بىرلەسىپ، ەلدىڭ شەكارالاس اۋداندارىندا تۇرعىن ۇيگە قولجەتىمدىلىكتى ارتتىرۋ بويىنشا جاڭا جوبالاردى ازىرلەيدى.

بۇل تۋرالى ۇلتتىق ەكونوميكا مينيسترلىگى اشىق تالقىعا شىعارعان اۋىلداردى دامىتۋدىڭ 2023-2027 -جىلدارعا ارنالعان تۇجىرىمداما- جوباسىندا جازىلعان، دەپ حابارلايدى قازاقپارات ءتىلشىسى.

«شەكارا ماڭىنداعى اۋىلداردا تۇراقتى تۇراتىن حالىقتى تۇرعىن ۇيمەن قامتاماسىز ەتۋ ماقساتىندا ءوز قىزمەتكەرلەرى ءۇشىن تۇرعىن ءۇي سالعان جۇمىس بەرۋشىلەردىڭ شىعىندارىن سۋبسيديالاۋ تەتىگى ەنگىزىلەدى. سونداي- اق جەكە تۇرعىن ءۇي قۇرىلىسىنا ارنالعان يگەرىلمەگەن جاڭا جەر ۋچاسكەلەرىنە ينجەنەرلىك- كوممۋنيكاتسيالىق ينفراقۇرىلىمدى جۇرگىزۋ جونىندەگى جۇمىس جالعاسادى. يندۋستريالىق- يننوۆاتسيالىق دامۋ سالاسىنداعى ۋاكىلەتتى ورگان «وتباسى بانكى» تۇرعىن ءۇي قۇرىلىس جيناق بانكى» ا ق- مەن بىرلەسىپ، ەلدىڭ شەكارالاس اۋداندارىندا تۇرعىن ءۇيدىڭ قولجەتىمدىلىگىن ارتتىرۋ جونىندەگى جاڭا جوبالاردى ازىرلەيدى»، - دەلىنگەن اشىق نقا پورتالىندا جاريالانعان تۇجىرىمدامادا.

سونىمەن قاتار كوشى- قون اعىنىن ازايتۋ ماقساتىندا ەلدى مەكەندەرگە ەڭبەك ميگرانتتارىن تارتۋ جۇمىسى جۇرگىزىلمەك.

«ەڭبەك ميگرانتتارىن تارتۋ ماقساتىندا ەڭبەك تاپشىلىعى بار وڭىرلەردىڭ شەكارالاس ەلدى مەكەندەرىندە جەر ۋچاسكەلەرىن كەيىننەن مەنشىككە بەرە وتىرىپ، ولاردى وتەۋسىز پايدالانۋعا بەرۋ مۇمكىندىگى قارالاتىن بولادى»، - دەپ جازىلعان كوپشىلىك تالقىلاۋعا شىعارىلعان قۇجاتتا.

قوسا كەتسەك، شەكارا ماڭىنداعى كليماتى قاتال اۋىل تۇرعىندارىنىڭ 1 جىلدىق ەڭبەك ءوتىلى 1,5 جىل بولىپ ەسەپتەلمەك.

بۇدان بولەك، تابيعي- كليماتتىق جاعدايى كۇردەلى شەكارا ماڭىنداعى ەلدى مەكەندەر ءۇشىن ەلەكتر ەنەرگياسىنا تومەندەتىلگەن تاريف بەلگىلەنەدى.