بيىل كوكپاردان ەل بىرىنشىلىگى «ۇلى دودا» اتاۋىمەن جاڭا فورماتتا وتەدى

استانا. قازاقپارات - بيىل كوكپاردان قازاقستان بىرىنشىلىگى «ۇلى دودا» اتاۋىمەن جاڭا فورماتتا وتەدى، دەپ حابارلايدى قازاقپارات.

مادەنيەت جانە سپورت مينيسترلىگى ۇلتتىق سپورتتىڭ تانىمالدىلىعىن ارتتىرىپ، ينفراقۇرىلىمىن دامىتۋ ماقساتىندا جۇيەلى جارىس ۇيىمداستىرۋدى كوزدەپ وتىر.

ەل چەمپيوناتى اياسىندا بىرنەشە ليگا جاساقتالادى. «الامان دودا» نەمەسە جوعارى ليگادا وتكەن جىلعى ەل چەمپيوناتىنىڭ قورىتىندىسى بويىنشا 1-6 ورىنداردى يەلەنگەن ەڭ ۇزدىك 6 كوماندا ونەر كورسەتەدى. قاتىسۋشى كوماندالار ءار تۋردا ءوزىنىڭ نەمەسە قارسىلاستىڭ الاڭىندا وينايتىن بولعاندىقتان كورەرمەندەر جوعارى ليگادا 30 ماتچ تاماشالاي الادى.

«مادەنيەت جانە سپورت مينيسترلىگى قازاقستاندا تولىققاندى كوكپار يندۋسترياسىن قالىپتاستىرۋ ماقساتىندا ەل چەمپيوناتىن ۇيىمداستىرۋدى ۇلكەن جاۋاپكەرشىلىك سانايدى. ۇلتتىق سپورت جانكۇيەرلەرى جارتى جىل بويى تارتىسقا تولى كەزدەسۋلەردى تاماشالاپ، ماۋسىم بويى ءوز كومانداسىنا جانكۇيەر بولا الادى. كەلەسى جىلدان باستاپ جوعارى ليگادا وينايتىن كوماندالارعا ءوز يپپودرومى بولۋى مىندەتتەلەدى. سونداي- اق، جاستار مەن جاسوسپىرىمدەر كوماندالارىن قاتار دايىنداۋ تۋرالى شارت قويىلادى»، - دەدى ق ر مادەنيەت جانە سپورت ۆيتسە- ءمينيسترى سارسەن قۇرانبەك.

«ءدۇبىرلى دودا» دەپ اتالاتىن قازاقستان چەمپيوناتىنىڭ ءبىرىنشى ليگاسىندا بىلتىرعى ەل چەمپيوناتىندا 7-20 ورىنداردى يەلەنگەن 14 كوماندا وينايدى. جارىس 4 تۋردان تۇرادى. قاتىسۋشى بارلىق كوماندالار ءبىر- بىرىنە قارسى كەزدەسۋ وتكىزىپ، ۇپاي جينايدى. جوعارى جانە ءبىرىنشى ليگانىڭ جەڭىمپازدارى رەسپۋبليكا كۇنى قارساڭىندا وتەتىن «ۇلى دودا» جارىسىندا ءوزارا مىقتىنى انىقتايدى.

بۇدان بولەك، ەل بىرىنشىلىگى اياسىندا «كەرمە دودا» اتاۋىمەن ەكىنشى ليگا ويىنعا شىعادى. بۇل جارىسقا قۇجاتى راستالعان اۋىلدىق، اۋداندىق نەمەسە جەكەمەنشىك كەز- كەلگەن كوماندا قاتىسا الادى. بايراقتى باسەكە 2 تۋردان تۇرادى جانە بارلىق قاتىسۋشى كوماندالار ءبىر- بىرىنە قارسى كەزدەسۋ وتكىزەدى. «كەرمە دودا» جەڭىمپازى كەلەسى ماۋسىمدا ءبىرىنشى ليگادا ويناۋ مۇمكىندىگىنە يە بولادى. ال، ءبىرىنشى ليگانىڭ ۇزدىك كومانداسى «الامان دوداعا» ياعني، جوعارى ليگاعا وتەدى.