شىلدەدەن باستاپ ەتنيكالىق قازاقتارعا ارنالعان «اتا جولى» كارتاسى ىسكە قوسىلادى
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، «اتا جولى» كارتاسىن ەنگىزۋدىڭ ماقساتى - تاريحي وتانمەن بايلانىستى نىعايتۋ، ۇلتتىق داستۇرلەردى ساقتاۋ، قازاقستاندا ولاردىڭ الەۋەتىن ىسكە اسىرۋ ءۇشىن ءبىزدىڭ ەلىمىزگە كاسىپقويلار مەن تابىستى بيزنەسمەندەردى تارتۋ. كارتا شەتەلدە تۇراتىن ەتنيكالىق قازاقتارعا ازاماتتىعىن ساقتاي وتىرىپ بەرىلەتىن بولادى. «اتا جولى» كارتاسىنىڭ يەگەرلەرى ەلگە كىرگەن كەزدە 10 جىل مەرزىمگە تۇرۋعا رۇقسات الادى.
«اتا جولى» كارتاسى بار ەتنيكالىق قازاقتىڭ قانداستاردان ايىرماشىلىعى - ول باسقا ەلدىڭ ازاماتى بولا تۇرا، قازاقستان رەسپۋبليكاسىنىڭ ازاماتتارىمەن جانە قانداستارىمەن تەڭ قۇقىققا يە.
«اتا جولى» كارتاسىنىڭ يەگەرى:
- مەديتسينالىق كومەكتىڭ كەپىلدىك بەرىلگەن كولەمى شەڭبەرىندە مەديتسينالىق مەكەمەلەردە الەۋمەتتىك تولەمدەر مەن قىزمەت كورسەتۋ؛
- ق ر ەڭبەك كودەكسىنە جانە «حالىقتىڭ كوشى- قونى تۋرالى» ق ر زاڭىنا سايكەس ق ر اۋماعىندا جۇمىسقا ورنالاسۋ؛
- قازاقستان اۋماعىندا كاسىپكەرلىك كودەكسكە جانە ق ر وزگە دە قۇقىقتىق اكتىلەرىنە سايكەس كاسىپكەرلىك قىزمەتتى جۇزەگە اسىرۋ؛
- ق ر «ءبىلىم تۋرالى» زاڭىنا سايكەس مەملەكەتتىك ءبىلىم بەرۋ ۇيىمدارىندا تەگىن ورتا ءبىلىم، مەملەكەتتىك ورتا ارناۋلى جانە/نەمەسە جوعارى وقۋ ورىندارىندا كونكۋرستىق نەگىزدە تەگىن ورتا ارناۋلى جانە/نەمەسە جوعارى ءبىلىم الۋ، جەكە وقۋ ورىندارىندا اقىلى ءبىلىم الۋ؛
- «ادۆوكاتتىق قىزمەت جانە زاڭ كومەگى تۋرالى» ق ر زاڭىنا سايكەس مەملەكەت كەپىلدىك بەرگەن زاڭ كومەگىن الۋ؛
- قازاقستان رەسپۋبليكاسىنىڭ ازاماتتىعى سالاسىنداعى حالىقارالىق شارتتارعا جانە ق ر زاڭنامالىق قۇقىقتىق اكتىلەرىنە سايكەس جەڭىلدەتىلگەن تارتىپپەن قازاقستان رەسپۋبليكاسىنىڭ ازاماتتىعىن الۋ قۇقىعىن پايدالانا الادى.
«اتا جولى» كارتاسى بار ادامداردىڭ ق ر مەملەكەتتىك ورگاندارى مەن جەرگىلىكتى ءوزىن- ءوزى باسقارۋ ورگاندارىنا سايلاۋعا جانە سايلانۋعا، رەسپۋبليكالىق رەفەرەندۋمعا قاتىسۋعا قۇقىعى جوق جانە مەملەكەتتىك قىزمەتكە كىرە المايدى.
بۇدان باسقا ەگەر «اتا جولى» كارتاسىنىڭ يەسى قازاقستان ازاماتتىعىن العان جاعدايدا ونىڭ كارتاسى جارامسىز دەپ تانىلادى.
«اتا جولى» كارتاسىنىڭ يەگەرلەرى ەڭبەك قىزمەتىن جۇزەگە اسىرۋ نەمەسە بيزنەس جۇرگىزۋ ءۇشىن قونىستانۋ ءوڭىرىن ءوز بەتىنشە تاڭدايدى.