ساكەن سەيفۋلليناعا سىيعا تارتىلعان اۆتوكولىك
ونى ساكەن دە، وزگەلەر دە ءوز ماشيناسى دەپ ەسەپتەگەنى داۋسىز...
ساكەن1937- جىلدىڭ 24- قىركۇيەك كۇنى ەكىندى ۋاقىتىندا تۇتقىندالدى. «فورمۋلا № 5» بلانك، «پروتوكول وبىسكا» دەپ اتالاتىن قۇجاتتا 1937- جىلدىڭ قىركۇيەگىندە قاز س س ر ن ك ۆ د-نىڭ مەملەكەتتىك قاۋىپسىزدىك باسقارماسىنىڭ قىزمەتكەرى كوناۆالوۆ پەن كۋرۋس ساكەن ۇيىنە ءتىنتۋ جۇرگىزگەندە قازاقتىڭ اۋىلشارۋاشىلىق مەكتەبىنىڭ وقۋشىلارى راحىمبەكوۆ ياقيا، ودەشوۆ سەرىك جانە سەيفۋللينا گۇلباهرام بولعاندىعىن اتاپ، قول قويعىزعان. تاركىلەۋ ءتىزىمى وسىلايشا جالعاسا بەرەدى...
اقىن اقتالعاننان كەيىن (1957 ج.) ماشينانىڭ يەسىنە قايتارىلماۋ جايىن ساكەن تانۋشى عالىم، ف.ع.د.، اكادەميك ت.كاكىشەۆ : «1985- جىلى قاسكەي وتەكينمەن سويلەسكەندە ول «ءوزىم باسى-قاسىندا جۇرسەم دە، ماشينانى راسىمدەۋ كەزىندە «پوداريت» دەمەي، قاتە «ۆىدەليت» دەپ جازىپپىز، سوعان بايلانىستى ماشينا گۇلباهرامعا قايتارىلماي قالدى عوي» دەپ ايتقانىن ءوز اۋزىنان ەستىدىم دەپ جازادى.
شىنىندا دا 1957- جىلى 6- قىركۇيەكتە ءماجىلىس قۇرعان مەملەكەتتىك كوميسسيا «سەيفۋلليننىڭ ءوز باسىنىڭ پايدالانۋىنا ءبىر ماشينا ءبولىنسىن» دەپ قاۋلى شىعارىلعانىنا بايلانىستى كەرى قايتارىلمايدى دەپ تاۋىپتى.
1936- جىلى مامىر ايىندا ماسكەۋدە وتكەن قازاقستان رەسپۋبليكاسىنىڭ مادەنيەتى مەن ونەرىنىڭ ون كۇندىگىندە جازبا ادەبيەتىنىڭ الىبى ساكەن مەن اۋىز ادەبيەتىنىڭ الىبى جامبىل كەۋدەلەرىنە ەڭبەك قىزىل تۋ وردەنىن قاداپ قايتقان. بۇل فوتوسۋرەت ۇلكەيتىلىپ جامبىل جابايەۆ مۇراجايىنىڭ ەكسپوزيسيا زالىندا باستى ەكسپونات ساناتىندا قويىلعان.
وعان سەبەپ تە جوق ەمەس، 1929- جىلى ساكەن باسپا بەتتەرىندە «اشىق حات» اتتى ماقالاسىن جاريالاپ، كەلەر ۇرپاققا ۇلگى-ونەگە، باستى تاربيە قۇرالى رەتىندە حالىق اۋىز ادەبيەتىن جيناۋ قاجەتتىگىن ەسكەرتىپ، دەرەۋ ىسكە كىرىسىپ تە كەتەدى. جوعارعى وقۋ ورىندارى، فيلولوگيا فاكۋلتەتتەرىنىڭ تۇڭعىش فولكلورلىق ەكسپەديسياسىن ۇيىمداستىرادى. ەل ءىشى التىن قازىنا، گازەت-جۋرنال بايلانىس قۇرالى ارقىلى ەلگە ساۋىن ايتىپ كارل ماركس 97 ءۇيىنىڭ ادرەسىن بەرىپ، كەيبىر قۇندى دەرەكتەرگە اقى تولەنەدى دەپ ىنتالاندىرۋمەن قوسا، ماسەلەن جاياۋ مۇسا، ءبىرجان سال، ءماشهۇر ءجۇسىپ، شورتانباي ت.ب. ەسىمدەرىن تىزبەكتەگەن.
الماتى وبلىسىندا تۇراتىن «كورۇعىلى»، قىرعىزدىڭ «ماناسى» سىندى قيسسا-داستانداردى كۇنى-ءتۇنى توقتاماي جىرلايتىن، سۋىرىپ سالما قارت جىراۋ، ايتىس اقىنى بار، تەز ارادا جازىپ الۋىمىز كەرەك دەپ التى الاشقا جار سالادى. وسىلايشا جامبىل جابايەۆتى كەڭ دارەجەدە ناسيحاتتاۋدىڭ سارا جولىن سالىپ كەتكەن ساكەن بولاتىن. 1931- جىلى باسپا بەتىن كورگەن «قازاق ادەبيەتى» اتتى 2 تومدىق كىتابىنىڭ «ەسكى ادەبيەت نۇسقالارى»، «بيلەر داۋىرىندەگى ادەبيەت» دەگەن اتپەن جاريالاۋى دا باتىلدىق، تەكتىلىك.
ساكەننىڭ ماشيناسى كەيىن جامبىلعا بەرىلەدى. قازاق ادەبيەتىنىڭ قوس الىبى مىنگەن كونە جادىگەر М - I» № 0088» ماشيناسى قازىرگى كۇندە ۇزىناعاشتاعى جامبىل جابايەۆ مۇراجايىندا جەكە سوعىلعان ورىن-جايدا (گاراج) ەرەكشە كۇتىممەن ساقتاۋلى. ساكەن مەن جامبىلدىڭ ماسكەۋدە قاتار وتىرىپ تۇسكەن فوتوسۋرەتى س.سەيفۋللين مۇراجايىنىڭ ادەبيەت زالىندا قازاقستان رەسپۋبليكاسىنىڭ تاريحىندا التىن ارىپپەن جازىلعان جىلناما «قازاقستان مادەنيەتى مەن ونەرىنىڭ ونكۇندىگى. ماسكەۋ. كرەمل. 1936.» اتتى ەكسپوزيسيالىق كورىنىستەگى قۇندى ەكسپونات رەتىندە ورىن الىپ، كورەرمەندەرگە ەرەكشە اسەر قالدىرادى. س.سەيفۋللين مەن ج.جابايەۆ مۇراجايلارىن مادەني بايلانىستىرىپ تۇرعان قوس جادىگەردىڭ ۇرپاققا ايتار باي تاريحى بار.
نازگۇل ساپيانوۆا،
س. سەيفۋللين مۇراجايىنىڭ عىلىمي قىزمەتكەرى
سۋرەتتە: س. سەيفۋللين مىنگەن اۆتوموبيل
BAQ.KZ