اباي وبلىسىندا قازاقستاننىڭ بىرنەشە ايماعىنان كەلگەن اسكەريلەر وقۋ- جاتتىعۋ وتكىزدى

سەمەي. قازاقپارات - سەمەيدە ق ر ۇلتتىق ۇلانى «شىعىس» وڭىرلىك قولباسشىلىعىنىڭ ۇيىمداستىرۋىمەن اسكەريلەر اراسىندا وقۋ- جاتتىعۋ جيىنى ءوتتى، دەپ حابارلايدى قازاقپارات ءتىلشىسى.

جيىنعا اباي وبلىسىنان بولەك، پاۆلودار، وسكەمەن، كۋرچاتوۆ قالالارىندا ورنالاسقان اسكەري ءبولىم كومانديرلەرى مەن ورىنباسارلارى قاتىستى. سەمەي ىرگەسىندەگى 3 كۇنگە سوزىلعان پوليگون اۋماعىنداعى وقۋ- جاتتىعۋ جيىنىنىڭ ماقساتى - اسكەريلەردىڭ كاسىبي بىلىكتىلىگىن ارتتىرىپ، شەبەرلىكتەرىن شىڭداۋ. بىرنەشە ايماقتان كەلگەن اسكەريلەر ءوزارا تاجىريبە الماستى.

«كۇشەيتىلگەن قارۋ- جاراقپەن جابدىقتالعان ب ت ر-80 سوڭعى جاڭارتىلعان ءتۇرى جول تالعامايدى، ويلى قىرلى جەرلەرمەن جۇرە بەرەدى. ونى كەڭەس اسكەرلەرى اۋعان سوعىسىندا قولدانعان. كەيىن 90- جىلداردان باستاپ رەسەي قارۋلى كۇشتەرىنىڭ جانە باسقا دا ءبىرقاتار بۇرىنعى كەڭەستىك رەسپۋبليكالاردىڭ بارلىق ءىرى قارۋلى قاقتىعىستارىندا قولدانىلعان. ونى باسقارۋ دا ەكىنىڭ ءبىرىنىڭ قولىنان كەلە بەرمەيدى. ب ت ر 80 تەك شۇڭقىرلاردى عانا ەمەس، سونىمەن قاتار سۋ كەدەرگىلەرىن دە قاۋىپسىز جەڭە الادى» ، - دەيدى 5518 اسكەري ءبولىمىنىڭ اعا مەحانيك جۇرگىزۋشىسى سەرجانت رۋسلان بەكەنوۆ.

وقۋ جاتتىعۋ جيىنىندا اسكەري قىزمەتكەرلەرگە بارلىق جاعداي جاسالعان. جاتتىعۋدان كەيىن تىنىستاۋ ءۇشىن ارنايى دەمالاتىن ورىندارمەن جابدىقتالعان تەحنيكالار دا بار. اسكەري كولىكتىڭ ءىشى كەڭ ءارى بارلىق زامان تالابىنا ساي جابدىقتارمەن جاساقتالعان.

«وقۋ مەتوديكالىق جيىنىنىڭ ماڭىزدىلىعى ۇلكەن. ءبىز وسىندا كەلىپ وزىمىزگە ءبىراز ءبىلىم الدىق. كوپ نارسەنى ۇيرەندىك»، - دەيدى 5518 اسكەري ءبولىمىنىڭ كومانديرى، پودپولكوۆنيك مەدەت ەرتايلاقوۆ.