كاير حالقى قازاق مادەنيەتى مەن ونەرىنە قانىقتى
كايردىڭ باستى ساحناسىندا وتاندىق ارتيستەر، سونىڭ ىشىندە قازاقستاننىڭ ەڭبەك سىڭىرگەن قايراتكەرلەرى، رەسپۋبليكالىق جانە حالىقارالىق بايقاۋلاردىڭ لاۋرەاتتارى ونەر كورسەتتى. ولار الماسبەك الماتوۆ، باتىرجان مىقتىبايەۆ، «سالتانات» مەملەكەتتىك بي ءانسامبلى، «استانا وپەرا» سوليستەرى، «الاش ۇلى»، «سۇلۋ» توپتارى جانە باسقا دا ونەرپازدار بولدى. ارتيستەر ەسترادالىق، حالىق اندەرى مەن كلاسسيكالىق شىعارمالاردى ورىندادى. ولارعا ديريجەر ابىلاي تىلەپبەرگەننىڭ باسشىلىعىمەن قۇرمانعازى اتىنداعى ۇلتتىق حالىق اسپاپتار وركەسترى سۇيەمەلدەدى.
كونسەرت ەكى ەلدىڭ مەملەكەتتىك گيمندەرىن ورىنداۋدان جانە سەنات سپيكەرى ماۋلەن اشىمبايەۆتىڭ قۇتتىقتاۋ سوزىنەن باستالدى. زالدا جەرگىلىكتى كورەرمەن كوپ بولدى. گالا- كونسەرت كورەرمەندەرى مىسىردىڭ ءداستۇرلى اۋەندەرىنىڭ پوپۋرريىن ەرەكشە جىلى قابىل الىپ، زور قوشەمەت ءبىلدىردى.
گالا- كونسەرتپەن قاتار كاير وپەرا تەاترىندا قازاق قولدانبالى ونەرىنىڭ كورمەسى ءوتتى. ۇلتتىق كيىمدەگى ارتيستەر مەن قولونەرشىلەر قوناقتاردىڭ نازارىنا قولدان جاسالعان ءداستۇرلى بۇيىمداردى ۇسىندى.
گالا- كونسەرتتەن كەيىن ق ر مادەنيەت جانە سپورت ءمينيسترى اسحات ورالوۆ مىسىردىڭ مادەنيەت ءمينيسترى نيەۆين ءال- كيلانيمەن كەزدەسۋ وتكىزدى. اسحات ورالوۆ ارىپتەسىنە مادەنيەت كۇندەرىن ۇيىمداستىرۋعا كومەكتەسكەنى ءۇشىن العىس ايتىپ، ءال- كيلاني مىرزانى جانە جەرگىلىكتى ارتيستەردى قازاقستانعا شاقىردى.
«مىسىردا قازاقستاننىڭ مادەنيەت كۇندەرىنە ارنالعان ءىس- شارالار جوعارى دەڭگەيدە وتكەنىن اتاپ وتكىم كەلەدى. كاير تۇرعىندارى مەن قوناقتارى ءبىزدىڭ ارتيستەرىمىزدىڭ ونەرىنە ءتانتى بولعانىنا سەنىمدىمىن. الەمدى قازاق مادەنيەتى مەن ونەرىمەن تانىستىراتىن وسىنداي ءىس- شارالار باسقا ەلدەردە دە وتەدى. وسىلايشا، مادەنيەت سالاسىنىڭ قىزمەتكەرلەرى الەمدىك ساحنالاردا ءوز تالانتتارىن كورسەتە الادى. مينيسترلىك بۇل باعىتتا بەلسەندى جۇمىس جۇرگىزىپ جاتىر»، - دەدى مادەنيەت جانە سپورت ءمينيسترى اسحات ورالوۆ.