وتاندىق كينوگەرلەر لوندوندا ۇزدىك دەپ تانىلدى

لوندون. قازاقپارات - قازاقستاندىق كوركەم تۋىندى لوندوندا وتكەن ەۋرازيالىق فيلمدەر فەستيۆالىنىڭ باس جۇلدەسىن جەڭىپ الدى.

گران- پريدەن بولەك وتاندىق كينوگەرلەر «ورىس تىلىندەگى ۇزدىك سسەناري»، «ۇزدىك جاس رەجيسسەر» جانە «كورەرمەندەر كوزايىمى» اتالىمدارى بويىنشا جۇزدەن جۇيرىك دەپ تانىلدى، دەپ حابارلايدى قازاقپارات ءتىلشىسى.

فەستيۆالدىڭ باس جۇلدەسىن مارينا قوناروۆانىڭ «ۇلى دالا زارى» فيلمى جەڭىپ الدى. كوركەم دۇنيە اشارشىلىق كەزىندە قىرىلعان قازاق حالقىنىڭ شىنايى تاريحي وقيعالارى تۋرالى سىر شەرتەدى. گران- پري ءۇشىن رەسەي، ارمەنيا جانە ۇلى بريتانيادان ۇسىنىلعان فيلمدەر دە تالاستى. قازاقستاندىق ءونىم ساراپشىلار مەن كورەرمەندەردىڭ جوعارى باعاسىنا يە بولدى.

«فيلم اۆتورلارى 100 جىلدان استام ۋاقىت بۇرىن قازاق حالقى وتكەرگەن تراگەديالارىن كەيىپكەرلەر ارقىلى شىنايى ءارى شەبەر جەتكىزۋگە تىرىسقان. بۇل وقيعالار قازاق حالقىن ءالى دە مازالايتىنى اڭعارىلىپ تۇر»، دەيدى بولگاريالىق قازىلار القاسىنىڭ مۇشەسى ناتالي ۆونگ.

بۇدان بولەك جورابەك مۇسابايەۆتىڭ «ءۇي» فيلمىنە جازعان سسەناريى «ورىس تىلىندەگى ۇزدىك سسەناري» دەپ تانىلدى. ال سايد اشىربايەۆ «ۇزدىك جاس رەجيسسەر» اتالىمى بويىنشا ماراپاتتالدى. جەڭىمپازدار قاتارىندا ارىپتەسىمىز، حابار تەلەارناسىنىڭ رەجيسسەرى اقبوبەك ءتولجانوۆا دا بار. ول ءابىش كەكىلباي ۇلى شىعارماسىنىڭ جەلىسى بويىنشا تۇسىرىلگەن «ۇيقىداعى ارۋدىڭ ويانۋى» اتتى دەرەكتى فيلمى ءۇشىن «كورەرمەندەر كوزايىمى» اتالىمىن قانجىعالادى.

فەستيۆالدىڭ ماقساتى - ەۋرازيالىق ايماقتىڭ كينەماتوگرافياسىن دامىتۋ، اعىلشىن ءتىلدى كەڭىستىكتە ىلگەرىلەتۋ جانە ەۋرازيالىق كينويندۋستريا وكىلدەرىن بۇكىل الەم ماماندارىمەن تانىستىرۋ. بيىل ول بەسىنشى رەت ۇيىمداستىرىلىپ وتىر.

«ەكى جىل بۇرىن تانىلعان فەستيۆال جەڭىمپازدارىنىڭ ءىسى ىلگەرىلەپ، بۇدان دا باسقا بايقاۋلاردا توپ جاردى. فيلمدەرى گولليۆۋدقا جول تارتىپ، امەريكا ەكراندارىندا كورسەتىلگەندەرى دە بار. قازاق كينو ونىمدەرىنىڭ جاڭا نارىقتاردى يگەرەتىن كەزى جەتتى دەپ ويلايمىن. ولاردى كورگەن كورەرمەننىڭ ۇلى دالا ەلىنىڭ اسەم تابيعاتىن تاماشالاۋ ءۇشىن قازاقستانعا بارارى حاق»، دەيدى ەۋرازيالىق شىعارماشىلىق گيلدياسىنىڭ ءتوراعاسى گارەت ستامپ.

ماراپاتتاۋ سالتاناتىنىڭ سىيلى قوناقتارى قاتارىندا لوندونداعى حاۆەرينگ اۋدانىنىڭ مەرى، ت م د مەملەكەتتەرى ەلشىلىكتەرىنىڭ وكىلدەرى بولدى. فەستيۆال ۇيىمداستىرۋشىلارى ونەر سۇيەر قاۋىمدى جۋىردا بۋرابايدا وتەتىن قىسقامەتراجدى كينونىڭ ەكىنشى حالىقارالىق بايقاۋىنا شاقىردى.