سەمەيدەگى ەت كومبيناتىنىڭ جەرى شەتەلدىكتەرگە ساتىلاتىنى راس پا - اكىم جاۋابى

None
سەمەي. قازاقپارات - اباي وبلىسىنىڭ اكىمى نۇرلان ۇرانحايەۆ ورتالىق كوممۋنيكاتسيالار قىزمەتىنىڭ كوشپەلى بريفينگىسىندە سەمەيدە كەڭەس زامانىندا شۇجىق ونىمدەرىمەن تانىمال بولعان ەت كومبيناتى قىتايلىق كاسىپكەرلەرگە ساتىلاتىنى تۋرالى اقپاراتقا جاۋاپ بەردى، دەپ حابارلايدى قازاقپارات ءتىلشىسى.

«ءسىز بريفينگ كەزىندە وبلىستاعى تاريحي ورىندار تۋرالى ايتىپ ءوتتىڭىز. مەن زووۆەتەرينارلىق ينستيتۋت پەن ەت كومبيناتى، ءجۇن- تەرى فابريكاسى سياقتى ءىرى كاسىپورىندار تۋرالى سۇرايىن دەپ ەدىم. ولار قىتايلىق بيزنەسمەندەرگە ساتىلادى دەگەن اڭگىمە ايتىلىپ ءجۇر. فەيك پە، فەيك ەمەس پە، سونى ايتا كەتسەڭىز»، - دەپ سۇرادى باق وكىلى.

نۇرلان ۇرانحايەۆتىڭ ايتۋىنشا، زووۆەتەريناريا ينستيتۋتى عيماراتىن قالپىنا كەلتىرۋ مۇمكىن ەمەس.

«زووۆەتەرينارلىق ينستيتۋت تۋرالى ايتساق، بىرنەشە رەت زەرتتەۋ جۇرگىزدىك. كەيىنگى جولى جەكە ءوزىم قازق س ع ز ي ماماندارىن تارتقانمىن. ولار بىزگە ناقتى قورىتىندى بەردى. ول قورىتىندى بويىنشا عيماراتتى ساقتاپ قالۋ مۇمكىن ەمەس، وكىنىشكە قاراي. عيمارات يەسىمەن سويلەسىپ، قابىرعالارىنىڭ ءبىرىن ەستەلىك ءۇشىن قالدىرۋدى سۇرادىق. باسقا مۇمكىندىگى جوق. جاۋىن مەن جەلدىڭ وتىندە وتە كوپ تۇرىپ قالعان»، - دەدى ول.

اكىمنىڭ سوزىنشە، ەت كومبيناتىنىڭ ورنىن شەتەلدىكتەرگە ساتۋ مۇمكىن ەمەس.

«بۇرىن سەمەيدە تۇرعان بولساڭىز بىلەتىن شىعارسىز. ول كومبيناتتىڭ ورنىندا ساتۋعا جارامدى ەشتەڭ جوق دەپ ويلايمىن. ال ول اۋماقتاعى جەر تەلىمىنىڭ يەسى بار. ءبىزدىڭ زاڭدى بىلەتىن بولساڭىز، جەردى شەتەلدىكتەرگە ساتۋ مۇمكىن ەمەس»، - دەدى ايماق باسشىسى.

سوڭعى جاڭالىقتار