اقتوبەدە ەكى جاسوسپىرىم سۋعا باتىپ كەتتى

اقتوبە. قازاقپارات - اقتوبە قالاسىندا ەكى ءجاسوسپىرىم سۋعا باتىپ كەتتى. ولار تىيىم سالىنعان جەرگە سۋعا شومىلعان، دەپ حابارلايدى قازاقپارات ءتىلشىسى.

اقتوبە توتەنشە جاعدايلار دەپارتامەنتىنىڭ قۇتقارۋ قىزمەتىنە الماتى اۋدانى اقتوبە فەرروقورىتپا زاۋىتى اۋماعىنداعى كوپىر ماڭىندا 2 جاسوسپىرىم سۋعا باتىپ كەتكەنى تۋرالى حابارلاما ءتۇستى. ولار تىيىم سالىنعان اۋماقتا شومىلعان.

«قۇتقارۋشىلار وقيعا ورنىنا جەتكەن كەزدە 3 بوزبالانى اعىس الىپ كەتكەنى بەلگىلى بولدى. بىرەۋى ءوز كۇشىمەن جاعاعا شىققان. الدىن الا بەلگىلى بولعانى - 16 جاستاعى جاسوسپىرىمدەر ءجۇزۋ بىلمەگەن. سۇڭگۋىرلەر ساعات 16:30 دا جاعادان 100 مەتر، تەرەڭدىگى 3,5 مەتر بولاتىن جەردەن جاسوسپىرىمدەردىڭ دەنەسىن شىعاردى»، - دەپ حابارلادى وبلىستىق تجد باسپا ءسوز قىزمەتىنەن.

ايتا كەتەيىك، 4-ماۋسىم كۇنى دە قايعىلى وقيعا بولعان ەدى. اقتوبە قالاسى الماتى اۋدانى ەلەك وزەنىنە 39 جاستاعى ەر ادام باتىپ كەتتى. ول دا رۇقساتى جوق جەرگە شومىلعان. سۇڭگۋىرلەر جاعادان 15 مەتر قاشىقتان، 4,5 مەتر تەرەڭدىكتەن ونىڭ دەنەسىن الىپ شىقتى. ەر ادام وتباسىمەن دەمالۋعا بارعان. «قازىرگى كەزدە الەۋمەتتىك جەلىدە ول بالانى قۇتقارىپ، ءوزى سۋعا باتىپ كەتكەنى تۋرالى ايتىلىپ جاتىر. بۇل اقپاراتتى قوسىمشا تەكسەرەمىز»، - دەپ حابارلادى وبلىستىق ت ج د باسپا ءسوز قىزمەتىنەن.

ەسكە سالساق، 3- ماۋسىم كۇنى قالادا 10 جاستاعى بالا سۋعا باتىپ كەتتى. ول ويناپ ءجۇرىپ، وزەنگە قۇلاعان. سونداي- اق ىرعىز اۋدانىندا بۇزاۋ ىزدەۋگە شىققان وقۋشىلاردىڭ دەنەسى سۋدان تابىلدى.