الماتىدا شاحماتتان ازيا قۇرلىقتىق چەمپيوناتى باستالدى
بالۋان شولاق اتىنداعى سپورت سارايىندا شاحماتتان ازيا قۇرلىقتىق چەمپيوناتىنىڭ رەسمي اشىلۋ سالتاناتى مەن ءبىرىنشى تۋر ويىندارى ءوتتى. شاراعا الماتى قالاسى اكىمىنىڭ ورىنباسارى ارمان قىرىقبايەۆ، قازاقستان شاحمات فەدەراتسياسىنىڭ (ق ش ف) پرەزيدەنتى تيمۋر تۋرلوۆ جانە ازيا شاحمات فەدەراتسياسىنىڭ باس حاتشىسى حيشام ال- تاحەر قاتىستى. تيمۋر تۋرلوۆ مەملەكەت باسشىسىنىڭ قولداۋىمەن قازاقستان شاحماتتىڭ ناعىز ورتالىعىنا اينالعانىن اتاپ ءوتتى.
«حالىقارالىق جارىستاردى ءجيى وتكىزۋ ەلىمىزدە شاحماتتى دامىتۋعا ءارى ءبىزدىڭ شاحمات فەدەراتسياسىنىڭ جۇمىسىن كۇشەيتۋگە كومەكتەسەدى. وسىلايشا بولاشاقتا بۇدان دا كوپ چەمپيوندار، مىقتى شاحماتشىلار شىعادى»، - دەدى ول.
ءوز كەزەگىندە حيشام ال- تاحەر قازاقستان پرەزيدەنتى قاسىم- جومارت توقايەۆقا ەلىمىزدەگى شاحماتتى دامىتۋعا قولداۋ كورسەتكەنى، الماتى اكىمى ەربولات دوسايەۆ پەن تيمۋر تۋرلوۆقا چەمپيوناتتى جوعارى دەڭگەيدە وتكىزگەنى ءۇشىن العىس ءبىلدىردى. جارىستىڭ اشىلۋ سالتاناتىنان سوڭ ءبىرىنشى تۋر ويىندارى ءوتتى. ونىڭ قورىتىندىسى بويىنشا قازاقستاندىق گروسسمەيستەر رينات جۇمابايەۆ قارسىلاسىنا مۇمكىندىك بەرمەي تازا جەڭىسكە جەتتى. سونداي- اق مۇرتاس قاجىعاليەۆ، دەنيس ماحنيەۆ، نوگەربەك قازىبەك جانە باسقالار جەڭىمپاز اتاندى. ايەلدەر اراسىندا ارناش باۋىرجان، ليا قۇرمانعالييەۆا، كسەنيا بالابايەۆا، امينا قايىربەكوۆا جەڭىسكە جەتتى.
قازاقستان شاحمات فەدەراتسياسىنىڭ مالىمەتىنشە، ازيا قۇرلىقتىق چەمپيوناتى شۆەيتساريا جۇيەسى بويىنشا جانە فيدە ەرەجەسىنە سايكەس 9 تۋردان تۇرادى. وعان ازيانىڭ 18 ەلىنەن 128 مىقتى ويىنشى قاتىسۋدا.
«جارىس 12-ماۋسىمعا دەيىن جالعاسادى. شارانىڭ جۇلدە قورى 100 مىڭ ا ق ش دوللارىن قۇرايدى. اشىق چەمپيوناتتىڭ ءتورت جەڭىمپازى جانە ايەلدەر چەمپيوناتىنىڭ ەكى جەڭىمپازى بيىل 29 -شىلدە – 25-تامىزى ارالىعىندا باكۋدە وتەتىن فيدە- 2023 الەم چەمپيوناتىنا قاتىساتىن بولادى. الەم كۋبوگىنىڭ جەڭىمپازدارى شاحمات الەمىندەگى ەڭ جوعارى اتاق - شاحماتتان الەم چەمپيونى اتاعى ءۇشىن تالاسادى»، - دەپ حابارلادى قازاقستان شاحمات فەدەراتسياسىنىڭ باسپا ءسوز قىزمەتىنەن.
ايتا كەتەيىك، شاحماتتان ازيا قۇرلىقتىق چەمپيوناتىن ۇيىمداستىرۋشىلار – ق ر مادەنيەت جانە سپورت مينيسترلىگى، ازيا شاحمات فەدەراتسياسى، الماتى قالاسى اكىمدىگى، قازاقستان شاحمات فەدەراتسياسى.