قازان قالاسىندا ابايعا بيۋست ورناتىلادى

سەمەي. قازاقپارات - قازان قالاسىندا ابايدىڭ بيۋستى ورناتىلادى. بۇل جايىندا اباي وبلىسىنىڭ اكىمى نۇرلان ۇرانحايەۆ ورتالىق كوممۋنيكاتسيالار قىزمەتىنىڭ كوشپەلى بريفينگىسىندە ءمالىم ەتتى، دەپ حابارلايدى قازاقپارات ءتىلشىسى.

«وبلىستا 423 تاريحي جانە مادەني ەسكەرتكىش بار. ولاردىڭ 13 ءى رەسپۋبليكالىق، 410 ى جەرگىلىكتى ماڭىزى بار ەسكەرتكىشتەر.

بىلتىردان بەرى 35 اۋلانى اباتتاندىرۋ باعىتىندا جوسپارلى جۇمىس باستالدى. بيىل تاعى 70 اۋلا اۋماعىن، سونداي- اق 15 قوعامدىق كەڭىستىكتى اباتتاندىرۋ جوسپارلاندى.

ولاردىڭ بىرىندە تاتار اقىنى مۇسا جالەلگە بيۋست ورناتۋدى كوزدەپ وتىرمىز. سونىمەن بىرگە قازان قالاسىندا ابايعا ارناپ ەسكەرتكىش (بيۋست) ورناتۋ جوسپارلانعان» ، - دەدى نۇرلان ۇرانحايەۆ.

سونداي- اق اكىم قالانى كوگالداندىرۋ باعدارلاماسى قوعامدىق دەمالىس ورىندارىن رەتكە كەلتىرۋدەن باستالاتىنىن اتاپ ءوتتى.

«جاسىل جەلەكتەردى كۇتۋ ءۇشىن جەرگىلىكتى سۋارۋ جۇيەسىنىڭ ءبىرىڭعاي سحەماسى جاسالادى. 60 شاقىرىم جولدى جوندەۋ جوسپارلانۋدا، ونىڭ اياسىندا تروتۋارلار دا جابدىقتالادى.

سونداي- اق قالانىڭ ساۋلەتتىك كەلبەتىن رەتتەۋگە، ونىڭ ارحيتەكتۋرالىق بىرەگەيلىگىن قالپىنا كەلتىرۋگە، نەعۇرلىم بىرتەكتى تارتىمدى قالالىق ورتانى قۇرۋعا مۇمكىندىك بەرەتىن ءبىرىڭعاي ديزاين كود قۇرۋ جوسپارلانۋدا. كوپپاتەرلى تۇرعىن ۇيلەردىڭ قاسبەتتەرىنە جوندەۋ جۇمىستارى جۇرگىزىلۋدە.

بىلتىر اسپالى كوپىردىڭ وڭ جاعالاۋىنداعى كوپىراستى كەڭىستىگىن پايدالانۋعا بەردىك.

بۇگىندە ول بالالار مەن جاستاردىڭ بوس ۋاقىتىن ءتيىمدى وتكىزىپ، جينالاتىن سۇيىكتى ورنىنا اينالدى. ءبىر اپتادان سوڭ، ماۋسىم ايىنىڭ 15 ءى كۇنى، ءدال وسىنداي كەڭىستىك سول جاعالاۋدا اشىلادى» ، - دەدى ايماق باسشىسى.

ونىڭ ايتۋىنشا، بەيبىتشىلىك ارالىن اباتتاندىرۋ جالعاسادى.

«كەزىندە بۇل جەردە «بالالار تەمىرجولى» بولعان. بالا كەزىمىزدە سول جەرگە بارىپ، سەرۋەندەپ قايتاتىنبىز. وكىنىشكە قاراي، قازىر ول جوق. سول سەبەپتى، ءبىز، ارالدا «بالالار تەمىرجولىن» سالامىز. بۇل جەر، ءسوزسىز، بالالارىمىزدىڭ، تازا تابيعات اياسىنداعى، ەڭ سۇيىكتى دەمالىس ورىندارىنىڭ ءبىرى بولادى دەپ سەنەمىن.

تاعى ءبىر جوبا - ەرتىس جاعالاۋىنان ارالعا اپارار جاياۋ جۇرگىنشىلەر كوپىرى. ول قالامىزعا كورىك بەرۋمەن قاتار، سەمەيلىكتەردىڭ ارالعا بارىپ، تابيعات اياسىندا سەرۋەن قۇرۋىنا قولايلى جاعداي جاسايدى»، - دەدى نۇرلان ۇرانحايەۆ.