سەمەيدەگى «جاڭا كوپىردى» جاپونداردى ءوزى جوندەيدى دەپ ويلايمىن - وبلىس اكىمى

سەمەي. قازاقپارات - اباي وبلىسىنىڭ اكىمى نۇرلان ۇرانحايەۆ ورتالىق كوممۋنيكاتسيالار قىزمەتىنىڭ كوشپەلى بريفينگىسىندە سەمەيدەگى «جاڭا كوپىردى» كىم جوندەۋى مۇمكىن ەكەنىن ايتتى، دەپ حابارلايدى قازاقپارات ءتىلشىسى.

«قالاداعى ەسكى اۆتو- جۇك كولىك كوپىرى تۋرالى ايتساق، جاعدايىن بىلەسىزدەر. زەرتتەۋدەن كەيىن شەكتەۋ قويىلعان. سالماعى 2,5 توننادان اسپايتىن كولىك قانا جۇرۋگە بولادى. كەلەشەكتە ونى جاياۋ جۇرگىنشى كوپىرى ەتۋدى جوسپارلاپ وتىرمىز. جانىنان بىلتىر جاڭا كوپىردىڭ قۇرىلىسى باستالعان. بۇگىنگى تاڭدا ينجەنەرلىك جەلىلەردى تارتتىق. شاكارىم داڭعىلىندا كوپ جەر قازىلدى. بيىلعا بيۋدجەتتەن 7,2 ميلليارد تەڭگە ءبولىندى. قازىر كوپىر تىرەگىنىڭ قۇرىلىسىنا دايىندىق ءجۇرىپ جاتىر. 2025 -جىلعا دەيىن كوپىردى سالىپ ءبىتىرۋىمىز كەرەك»، - دەگەن اكىم ەل اراسىندا «جاڭا كوپىر» اتالىپ كەتكەن اسپالى الىپ كوپىردىڭ جاعدايىنا دا توقتالدى.

«بىلتىر جاپوندار كەلىپ، زەرتتەۋ جۇرگىزدى. قازىر تەحنيكالىق تاپسىرما بار. نە ىستەۋ كەرەكتىگىن ءتۇسىنىپ وتىرمىز. تەحنيكالىق تاپسىرما نەگىزىندە سەمەي قالاسى اكىمدىگى جوبالاۋ- سمەتالىق قۇجاتتارىن ازىرلەپ جاتىر. سول بىتكەن سوڭ جۇمىس قولعا الىنادى. بۇل جەردە كوپىردىڭ قاڭقاسى عانا ەمەس، بەتىندەگى اسفالت جابىنى دا جوندەلەدى. جىل سايىن اسفالت جاڭالانعانىمەن ءدىرىلدىڭ كەسىرىنەن بۇلىنە بەرەدى. سوندىقتان بۇل جۇمىستىڭ ءبارىن وسىعان دەيىن اينالىسقان جاپونيالىق كومپانيا اتقارادى دەپ ويلايمىن. ناقتى كىم ەكەنىن ايتا المايمىن. ويتكەنى كونكۋرس قورىتىندىسى انىقتايدى. ءبىراق جاپونيالىق ماماندارمەن سويلەسىپ وتىرمىز. بىرنەشە رەت سويلەستىك، ورىنباسارلارىم، ءتيىستى باسقارما باسشىلارى، ءوزىم دە بايلانىستامىن. جىل اياعىنا دەيىن جوبالاۋ- سمەتالىق قۇجاتتاماسىن بىتىرسەك، كەلەسى جىلى جوندەۋ جۇرگىزەمىز»، - دەدى نۇرلان ۇرانحايەۆ.