شەكارادان اعىلعان بوسقىندار ءنوپىرىن رەتتەۋ قاعيدالارى جاريالاندى

None
استانا. قازاقپارات - ەڭبەك جانە حالىقتى الەۋمەتتىك قورعاۋ مينيسترلىگى پانا ىزدەگەن ادامداردىڭ جاپپاي اعىنى كەزىندە ۋاقىتشا قونىستانۋ پۋنكتىلەرىن ايقىنداۋ، قابىلداۋ جانە ورنالاستىرۋ قاعيدالارى تۋرالى ۇكىمەت قاۋلىسىنىڭ جوباسىن جاريالادى، دەپ حابارلايدى قازاقپارات ءتىلشىسى.

بۇل قۇجات الەۋمەتتىك سيپاتتاعى توتەنشە جاعداي كەزىندە قازاقستان شەكاراسىنا اعىلعان شەتەلدىكتەردى قارسى الۋدىڭ ءتارتىبىن بەكىتۋگە ارنالعان.

بوسقىن مارتەبەسىن الىپ ۇلگەرمەگەن مۇنداي شەتەلدىكتەرگە پانا ىزدەۋشى دەگەن تەرمين قولدانىلماق.

قاۋلى جوباسىندا «پانا ىزدەگەن ادام - جەرگىلىكتى اتقارۋشى ورگان بوسقىن مارتەبەسىن بەرۋ تۋرالى ءوتىنىشحاتى بويىنشا تۇپكىلىكتى شەشىم قابىلداعانعا دەيىن قازاقستان رەسپۋبليكاسىندا پانا ىزدەۋگە نيەت بىلدىرگەن شەتەلدىك نەمەسە ازاماتتىعى جوق ادام»، - دەگەن انىقتاما بەرىلگەن.

ال پانا ىزدەگەن ادامداردىڭ جاپپاي اعىلۋىن تىركەۋ ءۇشىن ءبىر مەزەتتە شەكاراعا كەلگەن مۇنداي ازاماتتاردىڭ سانى 100 دەن اسۋ كەرەك.

ىرگەلەس مەملەكەتتەردىڭ اۋماقتارىنان مەملەكەتتىك شەكارا ارقىلى پانا ىزدەگەن ادامداردىڭ جاپپاي كوشۋى تىركەلسە، جەرگىلىكتى اۋماقتاعى نەمەسە رەسپۋبليكا بويىنشا الەۋمەتتىك سيپاتتاعى توتەنشە جاعداي جاريالانادى. ونداي رەجيمدى ق ر پرەزيدەنتى ءتيىستى جارلىقپەن ق ر پارلامەنتىن دەرەۋ حاباردار ەتە وتىرىپ، قر پرەمەر- مينيسترىمەن جانە پارلامەنتى پالاتالارىنىڭ توراعالارىمەن رەسمي كونسۋلتاتسيالاردان كەيىن ەنگىزەدى.

«رەسپۋبليكالىق جانە وڭىرلىك جەدەل شتابتاردىڭ شەشىمدەرىن ورىنداۋ مىندەتتى»، - دەلىنگەن قاۋلى جوباسىندا.

پانا ىزدەۋشىلەردىڭ ۋاقىتشا قونىتاناتىن ورنىن جەدەل شتابتار ايقىندايدى.

سونداي- اق، قۇجاتتا قازاقستاننىڭ بۇكىل اۋماعىندا ەنگىزىلەتىن توتەنشە جاعدايدىڭ قولدانىلۋ مەرزىمى 30 تاۋلىكتەن، ال ونىڭ جەكەلەگەن جەرلەرىندە ەنگىزىلەتىن توتەنشە جاعدايدىڭ قولدانىلۋ مەرزىمى 60 تاۋلىكتەن اسپاۋعا ءتيىس ەكەنى دە ايتىلعان.

توتەنشە جاعدايدى ەنگىزۋگە نەگىز بولعان ءمان- جايلار جويىلماعان كەزدە ق ر پرەزيدەنتى ونىڭ قولدانىسىن مەرزىمدەر شەگىندە ۇزارتۋعا قۇقىلى.

«تەكسەرۋ پۋنكتتەرىنىڭ، شاتىرلى جانە ستاتسيونارلىق لاگەرلەردىڭ ورىندارى ءۇشىن باستاپقى تىرشىلىكتى قامتاماسىز ەتۋگە دايىندالعان ءتيىستى قۇرىلىمى بار ءارتۇرلى عيماراتتار مەن قۇرىلىستار (ساناتوريلەر، دەمالىس ۇيلەرى، پانسيوناتتار، بالاباقشالار، مەكتەپتەر، ينتەرناتتار جانە ت. ب.) پايدالانىلۋى مۇمكىن.

پانا ىزدەگەن ادامداردى ءبىرىنشى كەزەكتە تىرشىلىكپەن قامتاماسىز ەتۋ ءۇشىن قولدا بار جابدىقتاردىڭ سانى جەتكىلىكسىز بولعان جاعدايدا قىزمەتتىك- تۇرمىستىق ءۇي- جايلاردى، كلۋبتاردى پايدالانۋعا بولادى»، - دەلىنگەن قۇجاتتا.

ونداي ورىنداردى قارجىلاندىرۋ ۇكىمەتتىڭ رەزەرۆىنەن ىسكە اسادى.

«جەدەل شتابتىڭ شەشىمىندە كوزدەلگەن جاعدايلاردى قوسپاعاندا، پانا ىزدەگەن، ۋاقىتشا ورنالاستىرۋ ورىندارىنداعى ادامدار اتالعان اۋماقتان شىعا المايدى. قاجەت بولعان جاعدايدا بوسقىندار ماسەلەلەرى جونىندەگى ۋاكىلەتتى ورگاننىڭ حالىقارالىق ۇيىمدارعا پانا ىزدەگەن ادامدارعا جاردەم كورسەتۋ جونىندە سۇراۋ سالۋعا قۇقىعى بار» ، - دەپ جازىلعان قاۋلى جوباسىندا.

سوڭعى جاڭالىقتار