ءبىر جىل بۇرىنعى رەفەرەندۋم قوعامدىق بىرىگۋدىڭ جاڭا دەڭگەيگە كوتەرىلگەنىن كورسەتتى - ەرلان قارين

استانا. قازاقپارات - مەملەكەتتىك كەڭەسشى ەرلان قارين ءبىر جىل بۇرىن وتكەن رەسپۋبليكالىق رەفەرەندۋمدى ەسكە الىپ، كونستيتۋتسياعا ەنگىزىلگەن وزگەرىستەردىڭ ماڭىزى تۋرالى ايتىپ بەردى، دەپ حابارلايدى قازاقپارات.

«ءبىر جىل بۇرىن قازاقستاندىقتاردىڭ باسىم بولىگى، ياعني ازاماتتاردىڭ 77,18 پايىزى رەسپۋبليكالىق رەفەرەندۋمدا ەل كونستيتۋتسياسىن وزگەرتۋ تۋرالى زاڭ جوباسىن جاقتاپ داۋىس بەردى. كونستيتۋتسياعا ەنگىزىلگەن تۇزەتۋلەر پرەزيدەنت، پارلامەنت جانە سوت ينستيتۋتتارىن رەفورمالاۋدى كوزدەدى. وسىلايشا، مەملەكەت باسشىسىنىڭ 2022 -جىلدىڭ 16-ناۋرىزىندا جاريالانعان جولداۋىندا ايتىلعان اۋقىمدى ساياسي جاڭعىرۋ باعدارلاماسى كونستيتۋتسيالىق تۇرعىدان بەكىدى. بۇل رەفەرەندۋم قازاقستان قوعامى ءۇشىن ماڭىزدى وقيعا بولدى. ويتكەنى ءبىز ەل دامۋىنداعى جاڭا كەزەڭگە قادام باستىق» دەپ جازدى ەرلان قارين Telegram پاراقشاسىندا.

ونىڭ ايتۋىنشا، ەڭ باستىسى، رەفەرەندۋم - قوعامدىق بىرىگۋدىڭ جاڭا دەڭگەيگە كوتەرىلگەنىن كورسەتتى. ونى پرەزيدەنت جانە پارلامەنت سايلاۋلارىندا انىق بايقادىق.

جالپى، ەلىمىزدە وتە قىسقا مەرزىمدە جۇزەگە اسىرىلعان تۇبەگەيلى ساياسي رەفورمالار ايماقتاعى بىرەگەي قۇبىلىسقا اينالدى. قازاقستان جاڭا كۇن ءتارتىبىن بەلگىلەپ بەردى.

«كونستيتۋتسيالىق رەفورما مەن سوڭعى سايلاۋ سيكلى جاڭا ساياسي جۇيەنىڭ كەلبەتىن قالىپتاستىردى. پرەزيدەنتتىڭ ساياسي جاڭعىرۋ باعدارلاماسىن ىسكە اسىرۋ جالعاسا بەرەدى. الدىمىزدا اۋداندار مەن وبلىستىق ماڭىزى بار قالالار اكىمدەرىنىڭ سايلاۋى تۇر» دەيدى مەملەكەتتىك كەڭەسشى.