پرەزيدەنت قاسىم- جومارت توقايەۆ تۋ كوتەرۋ راسىمىنە قاتىستى
ەڭ الدىمەن، قۇرمەت قاراۋىلى روتاسىنىڭ باستىعى راسىمگە دايىندىعى جونىندە پرەزيدەنتكە راپورت بەردى. سودان كەيىن مەملەكەتتىك ءانۇران شىرقالىپ، كوك بايراعىمىز كوتەرىلدى، دەپ حابارلايدى قازاقپارات.
پرەزيدەنت قاسىم- جومارت توقايەۆ جينالعان قاۋىمدى مەملەكەتتىك رامىزدەر كۇنىمەن قۇتتىقتاپ، ولار ەگەمەندىك پەن ەلدىكتىڭ ەڭ باستى بەلگىسى ەكەنىن اتاپ ءوتتى.
«كوك بايراعىمىز، ەلتاڭبامىز جانە ءانۇرانىمىز - كۇللى حالقىمىزعا قاستەرلى نىشاندار. ءبىز ءۇشىن تاۋەلسىزدىك - ەڭ قىمبات قۇندىلىق، ال تۋىمىزدىڭ اسقاق جەلبىرەگەنى - اسا بيىك مارتەبە. باتىر بابالارىمىز سىن ساعاتتا ءاردايىم ءبىر تۋدىڭ استىندا جينالعان. ءبورىلى بايراق كۇللى تۇركى جۇرتىن بىرىكتىرگەن. ابىلاي حاننىڭ اق تۋى بۇكىل قازاقتىڭ باسىن قوسقان. الاش تۋى ارىستارىمىزدىڭ جىگەرىن جانىپ، نامىسىن قايراعان. ءبىز بابالارىمىزدىڭ داڭقتى جولىن جالعاستىرىپ كەلەمىز. بايراعىمىز بىرىككەن ۇلتتار ۇيىمىنىڭ تورىندە تۇر. ونى عارىشكەرلەرىمىز كوك جۇزىنە كوتەردى. الپينيستەرىمىز الەمنىڭ ەڭ بيىك شىڭدارىنا ورناتتى. سپورتشىلار جەڭىس تۇعىرىنان جەلبىرەتىپ، ءانۇرانىمىزدى شىرقاتتى. كۇللى الەم قازاق ەلىن كوك بايراعىنا قاراپ تانيتىن بولدى»، - دەدى مەملەكەت باسشىسى.
پرەزيدەنت قاستەرلى نىشاندارىمىزدى قۇرمەتتەۋ ءاربىر ازاماتتىڭ پەرزەنتتىك پارىزى ەكەنىنە نازار اۋدارىپ، بۇگىنگى سالتاناتتى ءراسىمنىڭ تاعىلىمدىق ءمان- ماڭىزىنا توقتالدى.
«ءبىز اسىل قۇندىلىقتارىمىزدى اياق استى ەتۋگە جول بەرمەيمىز. بيىل مەملەكەتتىك رامىزدەردى قورلاعان ادامداردى جازالاۋ شارالارى كۇشەيتىلدى. ءتۇسىندىرۋ جۇمىستارىنا ەرەكشە كوڭىل ءبولىنىپ جاتىر. وتانشىلدىق مەملەكەتتىك رامىزدەردى قاستەرلەۋدەن باستالادى. ءبىز ۇلتتىق نىشاندارىمىزدى ۇلىقتاۋ ارقىلى وسكەلەڭ ۇرپاققا ۇلگى- ونەگە كورسەتەمىز. ولاردى وتانسۇيگىشتىك، جاسامپازدىق رۋحتا تاربيەلەيمىز. سوندىقتان بۇگىنگى سالتاناتتى ءراسىمنىڭ تاعىلىمدىق، تاربيەلىك ءمانى ايرىقشا»، - دەدى قاسىم- جومارت توقايەۆ.
سونىمەن قاتار پرەزيدەنت مەملەكەتتىك رامىزدەر تاريحىمىزدى، وزىندىك بولمىسىمىزدى جانە حالقىمىزدىڭ جارقىن بولاشاققا ۇمتىلىسىن ايعاقتايتىنىن اتاپ ءوتتى.
«مەملەكەتتىك رامىزدەردە بۇكىل قازاقستان حالقىن بىرىكتىرەتىن، جالپىۇلتتىق بىرەگەيلىگىمىزدى نىعايتاتىن قۇدىرەتتى كۇش بار. ايتۋلى مەرەكەلەر مەن الەمدىك ءدۇبىرلى سپورت سايىستارىندا جەڭىسكە جەتكەن كەزدە جۇرەگىمىزدە وتانعا دەگەن سۇيىسپەنشىلىك وتى لاۋلاپ، ەلىمىزگە دەگەن ماقتانىش سەزىمى پايدا بولادى. كوك بايراعىمىز، ەلتاڭبامىز جانە ءانۇرانىمىز - مەملەكەتىمىزدىڭ مارتەبەسى، حالقىمىزدىڭ ار- نامىسى. ولار العا قاراي نىق قادام باسىپ، بيىك ماقساتتارعا قول جەتكىزۋ جولىندا كۇش- جىگەر بەرەدى»، - دەدى پرەزيدەنت.
سالتاناتتى ءراسىم بارىسىندا جوعارى اسكەري وقۋ ورىندارىنىڭ 12 ۇزدىك تۇلەگى قازاقستان پرەزيدەنتى - قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسىنىڭ قولىنان وفيتسەرلىك شەن الدى.
ق ر ق م راديوەلەكترونيكا جانە بايلانىس اسكەري- ينجەنەرلىك ينستيتۋتى:
1) ەسەنبايەۆ ميراس سۇلەيمان ۇلى
2) ءاشىم اقىل ەرمۇرات ۇلى
ق ر ق م قۇرلىق اسكەرلەرى اسكەري ينستيتۋتى:
3) امانالى ايداۋلەت مەدەت ۇلى
4) ساتكەيەۆ ءادىل مارعۇلان ۇلى
ق ر ۇ ق ك شەكارا قىزمەتى اكادەمياسى:
5) بەكبولاتوۆ ەرجان بەكبولات ۇلى
6) بىرلىك باۋىرجان جاناتبەك ۇلى
ق ر ءى ءى م ب. بەيسەنوۆ اتىنداعى قاراعاندى اكادەمياسى:
7) تەمىربەكوۆ سامات تالعات ۇلى
8) باقتياروۆا دانا اسلان قىزى
ق ر ۇلتتىق ۇلان اكادەمياسى:
9) تىلەگەن ءومىر رۋسلان ۇلى
10) كەرىمبەكوۆ ەربولات سۇلتان ۇلى
ق ر ت ج م م. عابدۋللين اتىنداعى ازاماتتىق قورعاۋ اكادەمياسى:
11) پولاتوۆ ەرباعلان ەركىن ۇلى
12) باكيراموۆ ديحان نۇرلان ۇلى
شارا سوڭىندا مەملەكەتتىك كۇزەت قىزمەتىنىڭ، قورعانىس جانە ىشكى ىستەر مينيسترلىكتەرىنىڭ قۇرمەت قاراۋىلى روتالارى پرەزيدەنت پەن جينالعان قاۋىم الدىنان سالتاناتتى مارشپەن ءجۇرىپ ءوتتى.
تۋ كوتەرۋ راسىمىنە پارلامەنت ءماجىلىسىنىڭ ءتوراعاسى ەرلان قوشانوۆ، پرەمەر- مينيستر ءاليحان سمايىلوۆ، مەملەكەتتىك كەڭەسشى ەرلان قارين، پرەزيدەنت اكىمشىلىگىنىڭ باسشىسى ولجاس بەكتەنوۆ، مەملەكەتتىك ورگاندار باسشىلارى، ۇكىمەت مۇشەلەرى، پارلامەنت دەپۋتاتتارى، مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى رەسپۋبليكالىق كوميسسيا مۇشەلەرى، جوعارى اسكەري وقۋ ورىندارىنىڭ كۋرسانتتارى مەن ولاردىڭ تۋىستارى قاتىستى.
