ماۋلەن اشىمبايەۆ: بەيبارىس سەكىلدى تۇلعانىڭ ءومىرى تاريح عىلىمى ءۇشىن وتە ماڭىزدى
كونفەرەنسيا بارىسىندا سەنات سپيكەرى تۇركىدەن شىققان داڭقتى بيلەۋشىنىڭ تۇلعاسى مەن ءومىرىن دارىپتەيتىن اۋقىمدى جيىندى جوعارى دەڭگەيدە وتكىزگەنى ءۇشىن مىسىر باسشىلىعى مەن حالقىنا قازاقستان پرەزيدەنتى قاسىم- جومارت توقايەۆتىڭ العىسىن جانە جىلى لەبىزىن جەتكىزدى. سونداي- اق ماۋلەن اشىمبايەۆ 1- قازاقستان مەن مىسىردىڭ ورتاق تاريحي- مادەني مۇراسىن ءارى قاراي زەرتتەپ، دارىپتەۋ جولىندا وسىنداي عىلىمي كونفەرەنسيالار وتكىزۋدىڭ ماڭىزى زور ەكەنىن ايتتى.
«ءال- ازھار - الەمدەگى ەڭ كونە جانە بۇگىنگە دەيىن ۇزدىكسىز قىزمەت ەتىپ كەلە جاتقان بىرەگەي جوعارى وقۋ ورنى. بۇل - مۇسىلمان الەمىنىڭ عانا ەمەس، جاھاندىق ويدى ولشەۋسىز بايىتقان، ادامزات كوشىن ىلگەرىلەتكەن ءبىلىم شاڭىراعى. ءوز داۋىرىندە بەيبارىس سۇلتان ۋنيۆەرسيتەتتى كۇردەلى جوندەۋدەن وتكىزىپ، وعان ەكىنشى تىنىس بەرگەنى تاريحتان ءمالىم. سوندىقتان بەيبارىستىڭ 800 جىلدىق مەرەيتويىنا ارنالعان كونفەرەنسيانىڭ ءال- ازھار قابىرعاسىندا ءوتۋىن وتە ورىندى دەپ قابىلدايمىز»، - دەدى ماۋلەن اشىمبايەۆ.
سونداي- اق ول قازاق دالاسىندا تۋىپ، مىسىردىڭ سۇلتانى بولعان بەيبارىس تۇركى جانە اراب جۇرتىنا ورتاق اسا كورنەكتى تاريحي تۇلعا ەكەنىن ايتتى. سوعان بايلانىستى ايگىلى قولباسشىنىڭ ءومىر جولىن زەرتتەۋ الەمدىك عىلىم ءۇشىن دە وزەكتى ءارى ماڭىزى جوعارى ءىس ەكەنى ءسوزسىز.
«ءبىزدىڭ تاريحي- مادەني بايلانىسىمىزدىڭ تامىرى تەرەڭنەن باستاۋ الادى. بەيبارىس سۇلتاننىڭ تۇلعاسى سونىڭ جارقىن دالەلى. ول قازاق دالاسىندا تۋىپ- ءوسىپ، اراب جەرىندە ايتۋلى باسشىعا اينالدى. بەيبارىس سەكىلدى تۇلعانىڭ ءومىرى تاريح عىلىمى ءۇشىن وتە ماڭىزدى ەكەنى ءسوزسىز. سوندىقتان ونىڭ زەرتتەۋ جانە دارىپتەۋ جۇمىستارىن ودان ءارى جالعاستىرۋدىڭ ماڭىزى زور دەپ ەسەپتەيمىز»، - دەگەن ماۋلەن اشىمبايەۆ بۇل باعىتتا قازاقستان بىرلەسىپ جۇمىس ىستەۋگە مۇددەلى ەكەنىن اتاپ ءوتتى.
پالاتا سپيكەرى ورتاق تاريح ەكى ەلدىڭ بايلانىسىن ارتتىرا تۇسەتىنىن ايتىپ، الداعى ۋاقىتتا قازاقستان مەن مىسىر اراسىنداعى مادەنيە- گۋمانيتارلىق قارىم- قاتىناس نىعايا بەرەتىنىنە سەنىم ءبىلدىردى.
سونىمەن قاتار ماۋلەن اشىمبايەۆ قازاقستاننىڭ مىسىرداعى مادەنيەت كۇندەرىنە ارنالعان ءىس- شاراعا قاتىستى. اتاپ ايتقاندا، كاير قالاسىنداعى «Cairo Opera House»وپەرا تەاترىندا قازاقستاندىق ونەر جۇلدىزدارىنىڭ قاتىسۋىمەن گالا- كونسەرت ءوتتى. وندا «استانا وپەرا» تەاترىنىڭ سوليستەرى، قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ارتىستەرى، «سالتانات» مەملەكەتتىك بي ءانسامبلىنىڭ بيشىلەرى جانە تاعى باسقا ونەرپازدار ونەر كورسەتتى. كەش بارىسىندا قازاق كومپوزيتورلارىنىڭ بەلگىلى تۋىندىلارى ورىندالدى.
ودان بولەك، ەلىمىزدىڭ مادەنيەت كۇندەرى اياسىندا قازاق حالقىنىڭ ءداستۇرى مەن ونەرىن دارىپتەيتىن قولونەر شەبەرلەرىنىڭ كورمەسى ۇيىمداستىرىلدى.
اۆتور:
قانات مامەتقازى ۇلى