مەملەكەتتىك رامىزدەر كۇنى: اقتاۋدا موتوشەرۋ ءوتتى

اقتاۋ. قازاقپارات - اقتاۋدا ق ر مەملەكەتتىك رامىزدەر كۇنىنە وراي موتوشەرۋ ءوتتى، دەپ حابارلايدى قازاقپارات ءتىلشىسى.

رامىزدەر كۇنىنە وراي 2 -ماۋسىمنان بەرى «AMANAT» پارتياسى «جاستار رۋحى» ج ق ماڭعىستاۋ وبلىستىق فيليالىنىڭ ۇيىمداستىرۋىمەن ءبىرقاتار ءىس- شارالار ءوتتى. مۇنايلى اۋدانى باتىر اۋىلىندا 200-گە جۋىق تۇرعىن ءانۇران شىرقادى. اقتاۋ قالاسىنىڭ جاستارى «امفيتەاتر» الاڭىندا «اتامەكەن»، «كوك تۋدىڭ جەلبىرەگەنى» اتتى پاتريوتتىق اندەردى ايتىپ، كوپشىلىكتىڭ نازارىن اۋداردى. ال 4-ماۋسىم كۇنى 12 موتوبايكەر مەن 20-دان استام جەڭىل كولىك جۇرگىزۋشىلەرى كوك بايراقتى جەلبىرەتىپ، 1 ساعات كولەمىندە قالانى ارالادى.

ۇيىمداستىرۋشىلاردىڭ ايتۋىنشا، بۇل شارا جاستاردى وتانسۇيگىشتىككە تاربيەلەۋگە باعىتتالعان.

«بارشاڭىزدى مەملەكەتتىك رامىزدەر كۇنىمەن قۇتتىقتايمىن. تاۋەلسىزدىگىمىزدىڭ تۇمارىنا اينالعان كوك تۋىمىز كوگىمىزدە جەلبىرەسىن. ەلتاڭبامىز ۇلىقتالىپ، ءانۇرانىمىز ىزگى ۇعىمداردىڭ رۋحاني جارشىسى رەتىندە شىرقالا بەرسىن» - دەدى ابزال مارات «AMANAT» پارتياسى «جاستار رۋحى» جق ماڭعىستاۋ وبلىستىق فيليالىنىڭ ءتوراعاسى

سونىمەن قاتار ابزال ماراتتىڭ ايتۋىنشا، بۇل يگى شاراعا قالا تۇرعىندارى دا بەلسەندى قاتىسقان.

«مەن قالا تۇرعىنى رەتىندە رامىزدەر كۇنىن ەرەكشە اتاپ ءوتۋدى ءجون سانادىم. ويتكەنى بۇل پاتريوتتىق رۋحتى كوتەرىپ، ۇلتتىق نامىستى ۇلىقتايتىن مەرەكە. حالقىمىزدىڭ تاۋەلسىزدىك نىشاندارىنا دەگەن قۇرمەتى اسا زور. بىرلىگى مىقتى، ىنتىماعى جاراسقان ەل بولايىق»، - دەدى سابىر سەرجان.