جۇمابەك تاشەنوۆپەن كەزدەسۋىم - باۋىرجان مومىش ۇلىنىڭ جازبالارىنان
جوعارعى سوۆەت پرەزيديۋمىنىڭ پرەدسەداتەلى جۇمابەك تاشەنوۆتى ەستىگەنىم بولماسا، كورگەن كىسىم ەمەس.
ۆەرحوۆنىي سوۆەتكە باردىم. تاپ مەنى كۇتىپ وتىرعانداي- اق كومەكشىسى ىزەتپەن الدىمنان شىعىپ، كەزەكسىز تىكتەن-تىكە پرەدسەداتەلدىڭ بولمەسىنە كىرگىزدى.
كەڭ كابينەتتىڭ تورىنەن ورتا بويلى تىعىنشىقتاي سارى جىگىت ورنىنان تۇرىپ، جەڭىل قاداممەن الدىمنان شىقتى.
امانداستىق. «تاقتىڭ» الدىنداعى ستولعا قاراما- قارسى وتىردىق.
- باۋكە، حالىڭىز قالاي؟ - دەگەن سۇراقتان ءسوزىن باستادى پرەدسەداتەل. - دەنساۋلىق قالاي؟
مەن جاۋاپ قاتتىم.
- ونشا ماقتانارلىق ەمەس... - دەپ باستاي بەرگەنىمدە، ول ستولداعى ءبىر سەدەپ تۇيمەنى باستى. كومەكشىسى جەتىپ كەلدى.
- ەراستوۆتى دەرەۋ شاقىر. پولكوۆنيكتى مينيسترلەر كەڭەسىنىڭ گوسپيتالىنە جاتقىزسىن.
- مەن ەراستوۆقا شاعىمدانبايمىن . .
- قاجەت بولسا، مەملەكەتتىك پالاتاداعى اۋرۋحاناعا جاتقىزىلسىن. بار.
كومەكشىسى كەتتى. مەن نە ايتارىمدى بىلمەستەن، ساسقالاقتاپ:
- راقمەت سىزگە، - دەپپىن.
- ءسىز اراق ىشەسىز بە؟
- ىشەمىن.
- سىزگە پيۆو دا ىشۋگە بولمايدى. تەمەكى تارتاسىز با؟
- تارتامىن.
- كوپ تارتاسىز با؟
- كوپ تارتامىن.
- ونىڭىزدى قويىڭىز. ءسىز بىزگە وتە كەرەك ادامسىز. نە ىستەپ ءجۇرسىز؟
- جازىپ ءجۇرمىن.
- نە جازىپ ءجۇرسىز؟
- كورگەن- بىلگەندەر مەن وتكەن- كەتكەندەر. مەنىڭ تەمالارىم...
- ول وتە دۇرىس ەكەن. ول دا بىزگە وتە كەرەك، - دەپ باستىرمالاتىپ ءسوزىمدى اياقتاتپادى.
«ە، بۇ كىسى اسىعىپ وتىر ەكەن عوي» دەگەن ويمەن ءتىلىمدى تارتتىم.
پرەدسەداتەل ماعان راحىمجان قوشقاربايەۆتىڭ ارىزىن كورسەتتى:
- مەن سىزبەن وسى جاعىنان اقىلداسايىن دەپ شاقىرىپ ەدىم...
قاعازدى وقىپ شىققان سوڭ:
- گو ليچنوە زاياۆلەنيە نە سلۋجيت وسنوۆانيەم )ونىڭ جەكە مالىمدەمەسى نەگىز بولا المايدى(، - دەدىم.
- قازاقشالاپ سويلەڭىز.
- ارحيۆتان دالەلدەيتۇعىن ماتەريالدار كەرەك. ولارسىز كيلىكسەڭىز، ۇيالىپ قالۋىڭىز مۇمكىن.
- مۇنىڭىز وتە دۇرىس اقىل. ونى قالاي تابامىز؟
- ىزدەۋ كەرەك.
- ءسىز ىزدەسەڭىز قايتەر ەدى؟
- ىزدەيىن.
- قاراجاتتى مەن بەرگىزەيىن.
- جوق. مەن قاراجات المايمىن.
- مۇنىڭىز نە؟
- تابا الماسام شە؟ ..
- جوق. ءسىز تاباسىز. ءسىز تاپپاعاندا، كىم تاپپاق ونى؟
- مەن ىزدەستىرەيىن. تاپسام دۇرىس، تاپپاسام - مويىنىما ەشقانداي مىندەتتەمە العىم كەلمەيدى...
- كەلىستىك. ءسىز ىزدەستىرەسىز، ءسىز تاباسىز.
- جارايدى. ءبىراق تا مەن اقشادان اۋلاقپىن.
- جارايدى. ال ەندى ءسىز تۋرالى دا كوپ حاتتار بار. ءسىزدى نەگە كەڭەس وداعىنىڭ باتىر اتاعىن المادى دەپ جازادى مەنىڭ اتىما...
- بۇل ۇكىمەتتىڭ قۇزىرەتى.
- مەن ۇكىمەت باستىعىمىن...
- ءسىز تەك رەسپۋبليكا جوعارعى كەڭەسى پرەزيديۋمىنىڭ ءتوراعاسىسىز...
- مەن ۆوروشيلوۆتىڭ ورىنباسارىمىن...
- ونى بىلەمىن.
- ءسىز مەنىڭ اتىما ارىز، ءومىربايانىڭىزدى تولىق ەتىپ جازىڭىز. بارلىق كورسەتكەن ەرلىكتەرىڭىزدى جازىڭىز. مەن ول ماسەلەنى ۆوروشيلوۆتىڭ الدىندا كوتەرەمىن.. .
- جوق. مەن ەش نارسە جازبايمىن. مەن تۋرالى جازىلعاندار از ەمەس.
- وندا سولاردى قاراستىرالىق. ولاردى قايدان تابۋعا بولادى؟
- مەن ول جاعىن بىلمەيمىن.
■ تاعى ءبىراز سويلەستىك.
باۋىرجان مومىش ۇلىنىڭ جازبالارىنان