دجو بايدەن ۇندەۋ جاسادى
پرەزيدەنت سوپاقشا كابينەتتەن ۇندەۋ جاسادى. ادەتتە مەملەكەت باسشىلارى ەل ءۇشىن اسا ماڭىزدى وقيعا بولعاندا اق ۇيدەگى كەڭسەسىنەن بايلانىسقا شىعادى. بۇل جولى دا بايدەن كونگرەسستىڭ قوس پالاتاسى اتقارعان جۇمىستى جوعارى باعالاپ، داعدارىستى بولدىرمادىق دەپ وتىر.
بۇگىن اق ءۇي باسشىسى كونگرەسس ماقۇلداعان زاڭ جوباسىنا قول قويدى. ا ق ش پرەزيدەنتى ۇلتتىق قارىزدىڭ شەگىن كوتەرۋ ءۇشىن كەلىسىمگە قول جەتكىزگەن قوس تاراپتىڭ وزدەرى قالاعانداي شەشىم بولماعانىن ايتتى. ءبىراق قاراپايىم امەريكالىقتار مۇددەسى بارىنشا قورعالعان دەيدى.
دجو بايدەن، ا ق ش پرەزيدەنتى:
- سونىمەن، بۇل كەلىسىم نە بەرەدى؟ بىرىنشىدەن، شىعىستاردى قىسقارتادى. الداعى 10 جىلدا بيۋدجەت تاپشىلىعى 1 تريلليون دوللارعا قىسقارادى جانە وعان قوسا 1,7 تريلليون دوللاردى ۇنەمدەگەن ەدىك. مەن پرەزيدەنتتىگىمنىڭ العاشقى 2 جىلىندا تاپشىلىقتى ايتارلىقتاي تومەندەتتىم. ماعان دەيىنگى 4 جىلدا ول 8 تريلليون دوللارعا دەيىن ۇلعايعان. ەندى ءبىز جاعدايدى وزگەرتە الامىز جانە ول امەريكا ءۇشىن جاقسى.
ادەتتە ا ق ش پرەزيدەنتتەرى اسا ماڭىزدى مالىمدەمەنى اق ۇيدەگى سوپاقشا كەڭسەسىنەن جاسايدى. ماسەلەن، دجوردج بۋش 2001 -جىلى 11- قىركۇيەكتەگى تەرراكت كەزىندە، باراك وباما 2010 -جىلى مەكسيكا شىعاناعىندا مۇناي توگىلگەندە، رونالد رەيگان 86-دا «چەللەندجەر» كەمەسى جارىلعاندا وسى كەڭسەدەن حالىققا ۇندەۋ جاساعان. اق ءۇي دجو بايدەننىڭ سوپاقشا كەڭسەدەن سويلەگەنىن، ەگەر مەملەكەتتىك قارىزدىڭ شەگى كوتەرىلمەسە، جاعدايدىڭ ۋشىعىپ كەتۋى قاۋىپى بولعانىمەن ءتۇسىندىردى.
جالپى ۇلتتىق قارىزدىڭ شەكتى دەڭگەيىن كوتەرۋ – ا ق ش- تا ءجيى بولاتىن ءادىس. ەل تاريحىندا 1960 -جىلدان بەرى 78 رەت مەملەكەتتىك قارىزدىڭ ليميتى ۇلعايتىلعان. بۇل پروتسەدۋرا ا ق ش- تىڭ قارجى مينيسترلىگىنە قۇندى قاعازدار شىعارىپ، ىشكى قورلاردان جانە سىرتتان قارىز الۋعا مۇمكىندىك بەرەدى.