الماتىدا مەملەكەتتىك تۋ سالتاناتتى تۇردە كوتەرىلدى
مەملەكەتتىك تۋدى «باتىر» پرەزيدەنتتىك پولكىنىڭ اسكەريلەرى كوتەرۋ ساتىندە قالانىڭ بارلىق اۋماعىندا، ياعني، ساعات 11.00-دە ءانۇران شىرقالدى. الماتى تۇرعىندارى ساياباقتاردا، سكۆەرلەردە، مەكتەپتەردە جانە باسقا دا قوعامدىق ورىنداردا ەلىمىزدىڭ ءانۇرانىن ورىندادى.
سالتاناتتى شاراعا الماتى اكىمى ەربولات دوسايەۆ، ءماسليحات دەپۋتاتتارى، قالا حالقى مەن جاستار ۇيىمدارىنىڭ وكىلدەرى قاتىستى.
«بۇگىنگى مەرەكە - ەرەكشە مەرەكە. سەبەبى، بۇل بارىمىزگە پاتريوتتىق سەزىم سىيلايدى. ول سونداي- اق جاس پەن كارىنى، وتانىن سۇيەتىن ءاربىر ازاماتتى بىرلىكتىرەتىن مەرەكە. بۇگىنگى شاراعا تەك جاستار ەمەس، جاسى ۇلكەن كىسىلەر دە قاتىسۋدا. جالپى بۇل شاراعا ءار سالاداعى جاستار، ونىڭ ىشىندە ۆولونتەرلەر، بەلسەندى جاستار، ستۋدەنتتەر، سپورتشىلار، IT ماماندارى، جيىنى مىڭنان استام جاستار قاتىسۋدا. بۇگىنگى مەرەكەگە وراي ءبارىمىزدىڭ باسىمىز قوسىلدى»، - دەدى الماتى قالاسى ۆولونتەرلەر فرونت وفيسىنىڭ جەتەكشىسى باعدات اناربايەۆا.
قۇرمەتتى تەمىرجولشى، دەربەس زەينەتكەر ورىنبەك شۇيىنشىاليەۆ بۇگىن كوك تۋىمىزدىڭ بيىككە كوتەرىلگەنىن كورىپ، قاتتى قۋانعانىن ايتتى.
«ەرەكشە قۋانىش ءارى ماقتانىش سەزىمىن كەشتىم. بۇل ءىس- شاراعا جاستاردىڭ، ستۋدەنتتەردىڭ، وقۋشىلاردىڭ قاتىسقانى وتە دۇرىس. بۇگىنگى سالتاناتتى جيىنعا قاتىسىپ وتىرعان جاستاردى مەن ەرتەڭ ومىردە ءوز جولىن تاپقان، ەلىمىزدىڭ ايتۋلى ازاماتتارى بولادى دەپ سەنەمىن. ال ءبىز ولارعا بىلمەگەنىن ۇيرەتىپ، اقىل- كەڭەس بەرۋگە ءارقاشان دايىنبىز»، - دەدى ول.
«مەن ءوز حالقىمدى، ونىڭ رامىزدەرىن جاقسى كورەمىن. بۇگىن ءبىزدىڭ ۆولونتەرلەر ءوز ەلىنىڭ پاتريوتى رەتىندە ءىس- شاراعا قاتىستى. شاراعا 130 ۆولونتەر قاتىستى. بۇل مەرەكەنى تويلاۋدىڭ ماقساتى ازاماتتاردى، جاستاردى وتانسۇيگىشتىككە باۋلۋ دەپ ويلايمىن. ونى مەن قۇپتايمىن، سەبەبى، جاستارىمىز ءوز ەلى ءۇشىن ۇلكەن تابىستارعا جەتىپ، حالىقارالىق دەڭگەيدە ەلىمىزدىڭ مەرەيىن ۇستەم ەتۋ ءۇشىن ولاردا پاتريوتتىق سەزىمى بولعانى دۇرىس»، - دەدى قازاقستان ۆولونتەرلار ليگاسى قوعامدىق قورىنىڭ الماتى قالاسى بويىنشا ۇيلەستىرۋشىسى لاريسا اندرەيەۆنا.
ەسكە سالايىق، الماتىدا مەملەكەتتىك رامىزدەر كۇنى شيەۆچەنكو كوشەسى بويىمەن م. گاندي اتىنداعى ساياباقتان قونايەۆ كوشەسىنە دەيىن ۆەلوجارىس وتەدى. وعان اركىم قاتىسا الادى. مارەگە جەتكەن كەزدە ق ر ءانۇرانىن جاپپاي ورىنداۋ ۇيىمداستىرىلادى.
كەشكە ساعات 19:30-دا اباي الاڭىندا وتاندىق ەسترادا جۇلدىزدارى، اتاپ ايتقاندا جۇبانىش جەكسەن ۇلى، ديلناز احماديەۆا، نۇرجان كەرمەنبايەۆ، گازيزحان شەكەربەكوۆ، مارحابا ءسابي، اراي، سىرىمتاي ەڭسەپوۆ جانە قازبەك قۇرايىش قاتىساتىن مەرەكەلىك كونسەرت وتەدى.
كونسەرتتەن سوڭ قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتتەرى مەن جامبىل اتىنداعى مەملەكەتتىك فيلارمونيا حورىنىڭ جاستار قۇرامى ق ر مەملەكەتتىك ءانۇرانىن ورىندايدى.
