ەلىمىزدە بالالارعا الەۋمەتتىك جەلىلەرگە كىرۋگە شەكتەۋ قويىلۋى مۇمكىن

استانا. قازاقپارات - قازاقستاندا بالالارعا تيكتوك، ينستاگرام جانە ۆكونتاكتە جەلىلەرىنە كىرۋگە شەكتەۋ قويىلۋى مۇمكىن. باستاما قابىلدانسا، بالالار اتا-انالارىنىڭ رۇقساتىنسىز بۇل قوسىمشالارعا تىركەلە المايدى. بۇل قالاي جۇمىس ىستەيتىنى ءالى بەلگىسىز.

ءبىراق اتا- انالار قاۋىمى بۇل ماسەلە بويىنشا ءوز پىكىرلەرىن ءبىلدىرىپ جاتىر. الەۋمەتتىك جەلىلەرگە ءجىپسىز بايلانعانداردىڭ قاتارىندا 15 جاسقا دەيىنگى بالالار ەكەنى بەلگىلى. ماسەلەن، 7 جاسار اديا ەدىگە تيك توك جەلىسىنىڭ بەلسەندى قولدانۋشىسى.

ءاديا ەدىگە، تيكتوكەر:

- تيكتوك جەلىسىنە العاش رەت 6 جاسىمدا ۆيدەو سالدىم. مەن ءۇشىن تيكتوك جەڭىل، سونداي- اق ول جەردە تانىمال بولا الاسىڭ. ماعان بي بيلەگەن، ءىنىمدى تۇسىرگەن ۇنايدى. بولاشاقتا 909 مىڭ وقىرمانىم بولعانىن قالايمىن. الايدا، شەكتەۋ قويىلاتىن بولسا، مەن يۋتۋبقا كوشەمىن.

ال اناسى قىزىنىڭ الەۋمەتتىك جەلىنى پايدالانۋىنا ەش قارسىلىق بىلدىرمەيتىنىن جەتكىزدى. سەبەبى بۇل - ونىڭ تاڭداۋى.

اسەمگۇل نۇرمۇحامەتوۆا، ءاديانىڭ اناسى:

- ارينە قولدايمىن. الايدا، ۋاقىت بويىنشا شەكتەۋ قويامىن. وعان ەرىك بەرسەڭ، 24 ساعات بويى وتىرا بەرۋشى ەدى. ءبىراق، وسىنداي جاعدايلاردا ءبىز بارمىز. مىندەتتى تۇردە شەكتەۋ قويىلۋ كەرەك دەپ ويلايمىن. ال بىلاي مەنىڭ ەش قارسىلىعىم جوق. بالا ءوزىن دامىتقىسى كەلىپ وتىر، تالپىنىسى بار. بۇل بالانىڭ ءوزىن- ءوزى كورسەتۋ ءتاسىلى. وعان ءبىز كەدەرگى بولماۋىمىز كەرەك.

بۇگىندە بالالاردىڭ كوبىسى كىشكەنتاي كەزدەرىنەن باستاپ تيك- توك جەلىسىندە وتىرادى. پسيحولوگتىڭ ايتۋىنشا، بۇل ەڭ بىرىنشىدەن بالانىڭ ويلاۋ قابىلەتىنە، ەكىنشىدەن زەيىنىنە اسەر ەتەدى.

ايمان نۇرماعامبەتوۆا، پسيحولوگ:

- ەڭ بىرىنشىدەن مىنا تيك-توكتى الساق، قازىرگى تيك- توك ءبىزدىڭ ومىرىمىزدە وتە ۇلكەن ورىن الىپ جاتىر، ءيا؟ سول تيك-توكتىڭ ءبىر ەرەكشەلىگىن ايتقىم كەلەدى: تيك-توك جالپى ۇلكەن اداممەن ويلاپ تابىلعان نارسە جانە ول ۇلكەن ادامدارعا ارنالعان كونتەنت دەيدى. ال ەندى بالالارعا ارنالعان كونتەنتتەر وتە از. جوقتىڭ قاسى دەپ تە ايتۋعا بولادى.

وسىعان وراي ەلىمىزدە بالالاردىڭ الەۋمەتتىك جەلىگە تىركەلۋىنە شەكتەۋ قويىلۋى مۇمكىن. مۇنداي شەكتەۋ شاراسى بالالاردى زورلىق- زومبىلىقتان قورعاۋ، سۋيتسيدتىڭ الدىن الۋ جانە ولاردىڭ قۇقىقتارى مەن ءال- اۋقاتىن قامتاماسىز ەتۋ ءۇشىن جاسالىپ وتىر.

عاني بەيسەمبايەۆ، ق ر وقۋ-اعارتۋ ءمينيسترى:

- كەزىندە «سيني كيت» دەگەن ماسەلە ءجۇردى. سول كەزدە حالىقتىڭ بارلىعى «نەگە باقىلاۋ ۇستالىنبايدى مەملەكەت تاراپىنان؟ نەگە بۇعان شەكتەۋلەر قويىلمايدى؟» دەگەن ماسەلەلەر كوتەرىلدى. جالپى شەكتەۋ دەگەن الاڭسىز تۇگەل شەكتەۋ ەمەس. بالالارعا ءتيىستى، قاجەتتى اقپارات بالاعا قولجەتىمدى بولۋى ءتيىس. دەنساۋلىعى مەن پسيحيكاسىنا اسەر ەتەتىن ماسەلەلەردەن بويىن اۋلاق ۇستاۋعا كومەكتەسۋ دەپ قابىلداعان دۇرىس دەپ ەسەپتەيمىن.

زەرتتەۋشىلەردىڭ پىكىرىنشە، الەۋمەتتىك جەلىلەردى ارتىق پايدالانۋ ۇيقىسىزدىققا اكەلىپ، مازاسىزداندىرادى، اگرەسسيۆتى مىنەز- قۇلىقتىڭ پايدا بولۋ مۇمكىندىگىن تۋدىرادى. سونىمەن قاتار، جاسوسپىرىمدەردىڭ ءتۇرلى مەديا جەلىلەرگە كىرۋى - كيبەربۋللينگ قاۋپىن ارتتىرادى.

ال ا ق ش- تىڭ يۋتا شتاتىندا 18 جاسقا جەتپەگەن جەتكىنشەكتەر اتا-انالارىنىڭ رۇقساتىنسىز الەۋمەتتىك جەلىلەردى پايدالانا المايدى. شتات گۋبەرناتورى وسىنداي زاڭعا قول قويدى. زاڭ 2024-جىلدىڭ ناۋرىز ايىندا كۇشىنە ەنەدى. بۇل تيكتوك، ينستاگرام جانە فەيسبۋك پلاتفورمالارىنا قاتىستى بولادى. ماماندار الەۋمەتتىك جەلىلەردىڭ كامەلەتكە تولماعاندارعا اسەرى جونىندە پىكىرلەرىن ءبىلدىرىپ جاتىر. جاڭا جىلدان باستاپ مونتانا شتاتىندا تيكتوكتى جۇكتەۋگە تىيىم سالىنادى.

www.24.kz