پرەزيدەنت ەۋروپالىق سەرىكتەستەردى كاسپي پورتتارىن دامىتۋعا شاقىردى
«ەۋروپالىق قايتا قۇرۋ جانە دامۋ بانكىنىڭ باعالاۋىنشا، 2030 -جىلعا قاراي ترانسكاسپي باعىتى جىل سايىنعى وتكىزۋ قابىلەتىن 250-300 مىڭ كونتەينەرگە دەيىن ارتتىرىپ، الەۋەتىن كەڭەيتە تۇسەدى. وسى كورسەتكىشكە قول جەتكىزۋ ءۇشىن سيفرلىق شەشىمدەر ەنگىزۋ جانە ينفراقۇرىلىمدى جاڭعىرتۋ بويىنشا جۇمىس جۇرگىزىپ كەلەمىز. قازاقستان، ازەربايجان، گرۋزيا جانە تۇركيا اۋماقتارى بويىنشا «وسال جەرلەردى» سينحروندى جويۋ جانە ترانسكاسپي باعىتىن دامىتۋ جونىندەگى جول كارتاسىنا قول قويىلدى»، - دەدى مەملەكەت باسشىسى.
پرەزيدەنت ەۋروپالىق سەرىكتەستەردى كاسپي تەڭىزى پورتتارىن دامىتۋعا، ولاردىڭ قىزمەتىن سيفرلاندىرۋعا، ترانسپورتتىق كەمەلەردى بىرگە وندىرۋگە جانە لوگيستيكالىق قويمالار قۇرۋعا بەلسەندى قاتىسۋعا شاقىردى.
«ترانسكاسپي باعىتى بويىنشا جۇكتەردىڭ ريەۆەرستى ترانزيتىن دامىتۋ ەۋروپالىق ەكسپورتتاۋشىلارعا قوسىمشا مۇمكىندىكتەر بەرەدى. ودان بولەك، قازاقستان ترانسكاسپي باعىتىن ترانسەۋروپالىق كولىك جەلىسىمەن (TEN- T) جانە «Global Gateway» مەگا باستاماسىمەن ۇشتاستىرۋ بويىنشا ەۋروپالىق سەرىكتەستەرمەن بىرلەسىپ جۇمىس ىستەۋگە دايىن. بيىل 19-مامىردا ەۋروپالىق بانك ەۋروپا مەن ورتالىق ازيا اراسىنداعى تۇراقتى كولىك بايلانىستارىنا جۇرگىزگەن زەرتتەۋىن ۇسىندى. وندا وڭتۇستىك قازاقستان اۋماعى ارقىلى وتەتىن «ورتالىق ترانسكاسپي جەلىسى» «ەڭ تۇراقتى نۇسقا» رەتىندە بەلگىلەنگەن»، - دەدى قاسىم- جومارت توقايەۆ.
ونىڭ ايتۋىنشا، «ورتالىق ترانسكاسپي جەلىسىن» ەداۋىر جاقسارتۋ ءۇشىن ينۆەستيتسياعا جالپى ينفراقۇرىلىمدىق قاجەتتىلىك 18,5 ميلليارد ەۋروعا باعالانادى.
«وسى اۋقىمدى جوبالاردى ۇشتاستىرۋ ءۇشىن ورتالىق ازيا مەن ەۋروپالىق وداق ەلدەرى اراسىنداعى كولىكتىك- لوگيستيكالىق ىنتىماقتاستىقتى دامىتۋ ستراتەگياسىن ازىرلەۋ ۇسىنىلادى»، - دەدى پرەزيدەنت.
اۆتور:
ايجان سەرىكجان قىزى