الەۋمەتتىك تولەمدەر حالىق ءۇشىن ەكىنشى ورىنداعى تابىس كوزىنە اينالعان

استانا. قازاقپارات - مەملەكەتتەن تولەنەتىن الەۋمەتتىك تولەمدەر حالىق ءۇشىن ەكىنشى ورىنداعى تابىس كوزىنە اينالعان.

ءماجىلىس دەپۋتاتى ءمادي تاكيەۆ Amanat پارتياسى فراكسياسىنىڭ حالىق تابىسىن ارتتىرۋ باعدارلاماسى تالقىلانعان جيىندا وسىنداي دەرەك كەلتىردى، دەپ حابارلايدى قازاقپارات ءتىلشىسى.

«ءوزىن- ءوزى جۇمىسپەن قامتىپ جۇرگەن قازاقستاندىقتار تۋرالى ايتساق، ولاردىڭ سانى 2 ميلليون ادامنان اسادى. بۇلاردىڭ شامامەن ۇشتەن ەكى بولىگى نەمەسە 65 پايىزى جۇمىسى بار كەدەيلەرگە جاتادى. ويتكەنى ايلىقتارى 100 مىڭ تەڭگەدەن تومەن. مۇنداي ادامداردىڭ 62 پايىزى اۋىلدا جۇمىس ىستەيدى. سالىق رەجيمى سارالانىپ بەلگىلەنەتىندىكتەن ولاردى كەدەي دەۋگە كەلمەيدى. ءبىراق بۇلاي قالدىرۋعا بولمايدى. تابىستىڭ تومەن بولۋىنان حالىق ءۇشىن الەۋمەتتىك تولەمدەر ەكىنشى ورىنداعى تابىس كوزىنە اينالدى. قازىردىڭ وزىندە حالىق كىرىسىنىڭ 23 پايىزى الەۋمەتتىك تولەمدەرگە تيەسىلى. 2015 -جىلدان بەرى بۇل ديناميكا ۋشىعىپ كەلەدى. ول كەزدە 178 پايىز ەدى. دامىعان ەلدەردى قاراساق، ولاردا الەۋمەتتىك تولەمدەر حالىق تابىسىنىڭ 10-15 پايىزىنان اسپايدى»، - دەدى دەپۋتات.

ءمادي تاكيەۆ قازاقستانداعى كەدەيلىك دەڭگەيى 16 پايىزعا جەتكەنى تۋرالى دەرەك كەلتىردى.

«تابىس از بولعاندىقتان، ينفلياتسيا اسقىنعاندىقتان قازاقستاندىقتاردىڭ 50 پايىزى تابىسىن تۇگەل ازىق- تۇلىككە جۇمساپ ءجۇر. باسقا شىعىندارعا جۇمسايتىن اقشاسى جوق. ودان كەيىن وڭىرلەردە دەرەكتەردىڭ تەڭگەرىمسىزىگىن كورىپ وتىرمىز.

دۇنيەجۇزىلىك بانكتىڭ مالىمەتى بويىنشا، قازاقستانداعى كەدەيلىك دەڭگەيى % 16- عا جەتكەن»، - دەدى ءماجىلىس دەپۋتاتى.