ترانسكاسپي باعىتى قىتايدىڭ «ءبىر بەلدەۋ، ءبىر جول» باستاماسىمەن ۇشتاسادى - پرەزيدەنت

استانا. قازاقپارات - ترانسكاسپي باعىتى قىتايدىڭ «ءبىر بەلدەۋ، ءبىر جول» باستاماسىمەن ۇشتاسادى. بۇل تۋرالى مەملەكەت باسشىسى قاسىم- جومارت توقايەۆ «ورتالىق ازيا - ەۋروپالىق وداق» باسشىلارىنىڭ ەكىنشى كەزدەسۋىندە سويلەگەن سوزىندە ايتتى، دەپ حابارلايدى اقوردانىڭ باسپا ءسوز قىزمەتى.

«ەكىنشى. كولىك- لوگيستيكالىق ينفراقۇرىلىمدى دامىتۋ. ورتالىق ازيا «قىتاي - ەۋروپا» باعىتى بويىنشا قۇرلىقتاعى ترانزيتتىك تاسىمالداردىڭ 80 پايىزدان استامى ءۇشىن وزىندىك كوپىر سانالادى. بۇل رەتتە قازىرگى كەزەڭدە ترانسكاسپي حالىقارالىق كولىك باعىتى ستراتەگيالىق ماڭىزعا يە بولدى. بۇل باعىت وڭىرلەرىمىز اراسىنداعى ءوزارا قارىم- قاتىناس دەڭگەيىن ەداۋىر ارتتىرا الادى. جۋىردا قىتايعا جاساعان مەملەكەتتىك ساپارىمنىڭ اياسىندا قىتايلىق سەرىكتەستەرىمىزبەن بىرگە شيان قالاسىندا لوگيستيكالىق تەرمينالدىڭ ىرگەتاسىن قالادىق. بۇل پورت ورتالىق ازيا تەرريتورياسى ارقىلى ەۋروپاعا تىكەلەي كونتەينەرلىك پويىزداردى جىبەرۋ ءۇشىن ماڭىزدى حاب بولماق. سونداي- اق ءبىز ترانسكاسپي باعىتىن قىتايدىڭ «ءبىر بەلدەۋ، ءبىر جول» باستاماسىمەن ۇشتاستىرۋعا ۋاعدالاستىق. بىلتىر وسى كۇرە جول ارقىلى شامامەن 1,7 ميلليون توننا جۇك تاسىمالدانعانىن اتاپ وتكىم كەلەدى. بۇل 2021 -جىلعى كورسەتكىشتەن ەكى ەسە كوپ»، - دەدى ق ر پرەزيدەنتى.

قازاقستاننىڭ ەۋروپالىق وداقپەن ءوزارا ءىس- قيمىلى 29 نەگىزگى باعىت بويىنشا بەلسەندى دامىپ كەلەدى.

«قازاقستاننىڭ ەۋروپالىق وداقپەن ءوزارا ءىس- قيمىلى 29 نەگىزگى باعىت بويىنشا بەلسەندى دامىپ كەلەدى. ەۋروپالىق وداققا مۇشە مەملەكەتتەرمەن كەڭەيتىلگەن ارىپتەستىك جانە ىنتىماقتاستىق تۋرالى كەلىسىم بار. قازاقستاندا Shell, Eni, Total, Air Liquide, Alstom, Siemens جانە باسقا ترانسۇلتتىق كورپوراتسيالاردى قوسا العاندا، ەۋروپالىق كاپيتالدىڭ قاتىسۋىمەن 3 مىڭنان استام كومپانيا جۇمىس ىستەيدى»، - دەدى مەملەكەت باسشىسى.

پرەزيدەنت قوس تاراپتىڭ جان- جاقتى ارىپتەستىگى سيرەك مەتالدار، «جاسىل» سۋتەگىن ءوندىرۋ سياقتى ستراتەگيالىق ماڭىزدى سالالارداعى پەرسپەكتيۆالى جاڭا ۋاعدالاستىقتار ارقىلى نىعاياتىنىن اتاپ ءوتتى.

«العا باستايتىن جوبالاردىڭ ءبىرى - Svevind نەمىس- شۆەد كومپانياسىنىڭ جەل جانە كۇن ەلەكتر ستانسالارىن ورناتۋ جانە قازاقستاندا ءۇش ميلليون توننا «جاسىل» سۋتەگى ءوندىرۋ زاۋىتىنىڭ قۇرىلىسىن باستاۋى بولدى. بۇل ە و- نىڭ وسى ونىمگە دەگەن قاجەتتىلىگىنىڭ شامامەن % 20- ىن قۇرايدى»، - دەدى قاسىم- جومارت توقايەۆ.

ايتا كەتەيىك، پرەزيدەنت قاسىم- جومارت توقايەۆ ورتالىق ازيا مەملەكەتتەرى مەن ەۋروپالىق وداق باسشىلارىنىڭ ەكىنشى كەزدەسۋىنە قاتىسۋ ءۇشىن شولپان- اتا (قىرعىزستان) قالاسىنا جۇمىس ساپارىمەن باردى.