الىبەك قۋانتىروۆ: بىزدە وليگارحيالىق ەكونوميكا جوق، ءبىراق دەوليگارحيزاتسيا ءجۇرىپ جاتىر

استانا. قازاقپارات - ۇلتتىق ەكونوميكا ءمينيسترى الىبەك قۋانتىروۆ ءماجىلىس كۋلۋارىندا ب ا ق وكىلدەرىنە بەرگەن سۇحباتىندا قازاقستان ەكونوميكاسىنىڭ وليگارحيالىق سيپاتى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«بىزدە وليگارحيالىق ەكونوميكا بار دەپ ايتپاس ەدىم. ويتكەنى ەكونوميكاداعى ورتا بيزنەستىڭ ۇلەسى قازىردىڭ وزىندە 36,5 پايىز بولىپ تۇر، جاقسى ءوسىپ كەلەدى. ال ۇزاق مەرزىمگە بەرىلەتىن، ارزان اقشانىڭ جەتپەي جاتقانى تۋرالى ايتساق، اقشا ءاردايىم جەتپەيدى»، - دەدى مينيستر.

ونىڭ ايتۋىنشا، ەلدەگى نەگىزگى جۇمىس بەرۋشىلەر - شاعىن جانە ورتا بيزنەس.

«ءبىزدىڭ ەكونوميكا وليگارحتار ەكونوميكاسى ەمەس. سەبەبى وليگارح دەگەن - ۇلكەن بيزنەسى بار جەكە كاسىپكەر. ارينە، قازىر دەوليگارحيزاتسيا، دەمونوپوليزاتسيا باعىتىندا جۇمىس ىستەلىپ جاتىر.

بۇگىنگى تاڭدا 4,1 ميلليون ادام شاعىن جانە ورتا بيزنەستە جۇمىس ىستەپ جاتىر. ءبىر جىل بۇرىن 200 مىڭ ادامعا تومەن بولعان»، - دەدى الىبەك قۋانتىروۆ.