ماسكۇنەمدەردى ەمدەگەننەن پايدا جوق - مينيستر ۋچاسكەلىك كوميسسيا جۇمىسىن سىنعا الدى

استانا. قازاقپارات - ەلوردادا مەديتسينالىق ايىقتىرعىشتار سانىن ۇلعايتۋ قاجەت. «قوعاممەن سەرىكتەستىكتە قوعامدىق قاۋىپسىزدىكتى قامتاماسىز ەتۋ» تۇجىرىمداماسى اياسىندا استاناداعى ماسەلەلەر كارتاسىن تانىستىرعان ىشكى ىستەر ءمينيسترى مارات احمەتجانوۆ وسىنداي باستاما كوتەردى، دەپ حابارلايدى قازاقپارات ءتىلشىسى.

«ەلوردادا ماس كۇيىندە كىسى ءولتىرۋ فاكتىلەرىنىڭ % 70، دەنساۋلىققا اۋىر زيان كەلتىرۋدىڭ ۇشتەن ەكى بولىگى، ءاربىر ەكىنشى زورلاۋ جانە ءۇشىنشى بۇزاقىلىق قىلمىسى جاسالادى. وتكەن جىلى استانادا ماس قىلمىسكەرلەردىڭ قولىنان 18 ازامات قازا تاپتى»، - دەپ ءمالىم ەتتى ول.

مينيستر سوزىنشە، بۇگىندە ەلوردادا ماستىعىن كۋالاندىرۋ بويىنشا ءبىر عانا پۋنكت جۇمىس ىستەيدى.

وندا 3 ساراپشى عانا بار. ال ءبىر كۇندە ولارعا شامامەن 50-70 ادام جەتكىزىلەدى. سوندىقتان ونىڭ جۇكتەمەسى شامادان تىس كوپ.

«پاترۋلدىك جاساقتار قۇقىقتىق ءتارتىپتى قورعاۋدىڭ ورنىنا ءبىر قۇقىق بۇزۋشىنى تەكسەرۋگە 2 ساعاتقا دەيىن ۋاقىت جۇمسايدى. بۇل ۋاقىت جولعا، كەزەكتە تۇرۋعا، قورىتىندى الۋعا كەتەدى. ناتيجەسىندە باسقا قوڭىراۋلارعا ۋاقىتىندا قىزمەت كورسەتىلمەيدى جانە ازاماتتار شاعىمدانادى. سوندىقتان مەديتسينالىق ايىقتىرعىشتار سانىن ۇلعايتۋ قاجەت. قالادا بار ورتالىق تەك 20 ورىنعا ارنالعان. جىل باسىنان مۇندا 3 مىڭ ادام جەتكىزىلدى»، - دەپ ماسەلە كوتەردى مارات احمەتجانوۆ.

سونداي- اق مينيستر ماسكۇنەمدىكتى ەمدەۋ تاسىلدەرىن قايتا قاراۋ قاجەت ەكەنىنە توقتالدى.

ونىڭ مالىمدەۋىنشە، قالادا 50 ورىنعا ارنالعان مامانداندىرىلعان ەمدەۋ- ساۋىقتىرۋ مەكەمەسى بار.

«جىل باسىنان بەرى سوت تەك 29 ادامعا ماجبۇرلەپ ەمدەۋدى تاعايىندادى. بۇل - ەلدەگى بۇكىل وسىنداي شەشىمدەردىڭ تەك 2 پايىزى. بۇل رەتتە ەلوردادا ەسەپتە 2 مىڭ ادام تۇر. بۇل رەتتە مەن ۋچاسكەلىك كوميسسيالاردىڭ ءالسىز جۇمىسىن اتاپ وتكىم كەلەدى. سونىمەن قاتار، ەمدەۋدىڭ اسەرى دە جوق. وتباسىندا جاڭجال شىعارعاندار وسىنداي ەمدەۋ ورىندارىنا بىرنەشە رەت جىبەرىلگەن، ءبىراق شىققاننان كەيىن ءىشۋدى ءارى قاراي جالعاستىرادى»، - دەپ تۇيىندەدى مارات احمەتجانوۆ.