قارۋلى كورتەج، ساراي جانە ميلليونەرلەر: يوردانيا حانزاداسىنىڭ ۇيلەنۋ تويى قالاي ءوتتى

None
استانا. قازاقپارات - بەيسەنبى كۇنى يوردانيادا كورولدىك ۇيلەنۋ تويى ءوتتى. يوردانيانىڭ مۇراگەر حانزاداسى حۋسەين بين ابداللا مەن ونىڭ قالىڭدىعى رادجۆا ال- سايف رەسمي تۇردە نەكەگە وتىردى.

ءىس- شارا كورولدىك ءۇشىن دە، حاشيميت الەۋەتى ءۇشىن دە ەڭ اتاۋلى ءارى ماڭىزدى وقيعالاردىڭ ءبىرى بولدى، دەپ حابارلايدى قازاقپارات ءتىلشىسى.

نەكە قيۋعا ارنالعان سالتاناتتى ءىس- شارا كەشە، بەيسەنبى كۇنى اممان قالاسىنداعى زاحران سارايىندا ۇيىمداستىرىلىپ، وعان يوردانيا كورولدىك وتباسىنىڭ مۇشەلەرى جانە كورولدىك وتباسىلاردىڭ وكىلدەرى مەن شەت مەملەكەتتەردىڭ باسشىلارى بار 140 قوناق قاتىستى. جاس جۇبايلار «كاتب ال- كيتاب» يسلام جولىمەن نەكە قيۋ ءراسىمىن جاسادى.

قالىڭدىق سارايعا مۇراگەر حانزادانىڭ اجەسى، ومىردەن وزعان پاتشايىم زەين ال- شاراف ءۇشىن ارنايى تاپسىرىسپەن جاسالعان، 1968 -جىلى شىعارىلعان Rolls-Royce Phantom V اۆتوموبيلىمەن كەلدى.

نەكە قيۋ سالتاناتتى ءراسىمى اياقتالعاننان كەيىن مۇراگەر حانزادا حۋسەين بين ابداللاعا تۇرمىسقا شىققان ءۇشىن قالىڭدىققا ۇلى كورولدىك جوعارى مارتەبەلى حانشايىم رادجۆا ال- حۋسەين اتاعى بەرىلگەنى تۋرالى كورول جارلىعى شىعارىلدى.

ءىس- شاراعا دانيا، نيدەرلاندى، بەلگيا، جاپونيا، ليۋكسەمبۋرگ، بۋتان مەن شۆەتسيا كورولدىك وتباسىلارىنىڭ مۇشەلەرى، ونىڭ ىشىندە نيدەرلاندى پاتشاسى مەن پاتشايىمى، يسپانيانىڭ قۇرمەتتى پاتشاسى 1 حۋان كارلوس پەن پاتشايىم سوفيا، سونىمەن قاتار ۋەلس حانزاداسى مەن حانشايىمى ۋيليام مەن كەيت قاتىستى. سونداي- اق يلون ماسك، دجەف بەزوس، امەريكا قۇراما شتاتتارىنىڭ ءبىرىنشى حانىمى دجيل بايدەن، ءابۋ- ءدابيدىڭ كرونپرينتسى حالەد بين موحامماد، قاتار شەيحى حاليف بەن حاماد التاني جانە ونىڭ جۇبايى شەيح موزا، ليۆان پرەمەر- ءمينيسترى نادجيب ميكاتي جانە وزگە دە مارتەبەلى قوناقتار بولدى.

حۋسەين بين ابداللا 1994 -جىلى 28-ماۋسىمدا دۇنيەگە كەلگەن. ءسابيدىڭ اتى اتاسى پاتشا حۋسەين بين تالالدىڭ قۇرمەتىنە وراي قويىلعان. حۋسەين ا ق ش- تىڭ دجوردجتاۋن ۋنيۆەرسيتەتىندە ءبىلىم العان. سونىمەن قاتار ول اكەسى - كورول2 ابداللا سياقتى ساندحەرستەگى بريتاندىق مارتەبەلى كورولدىك اكادەميانىڭ تۇلەگى. يوردانيا قارۋلى كۇشتەرىنىڭ كاپيتانى شەنى بار. ەلدە كورول بولماعان كەزدە وزىنە رەگەنت (مونارح ورنىنا مەملەكەتتى ۋاقىتشا باسقارۋشى) وكىلەتتىگىن الادى.

ونىڭ قالاۋلىسى رادجۆا ال- سايف ساۋد ارابياسىندا ورتا ءبىلىم العاننان كەيىن نيۋ- يوركتەگى سيراكۋز ۋنيۆەرسيتەتىندە ساۋلەت سالاسىن وقىپ، لوس- اندجەلەستەگى ديزاين جانە مەرچاندايزينگ ينستيتۋتىن بىتىرگەن. قالىڭدىقتىڭ اكەسى اراب تۇبەگىندەگى تامىرى تەرڭدە جاتقان ەڭ تانىمال سۋباي تايپاسىنىڭ وكىلى جانە ساۋد ارابياسىنداعى جەتەكشى قۇرىلىس كومپانيالارىنىڭ ءبىرى - El Seif Engineering Contracting كومپانياسىنىڭ نەگىزىن قالاۋشى. قالىڭدىقتىڭ اناسى اززا بينت نايەف ال- سۋدايري ساۋد ارابياسىنىڭ نەگىزىن قالاعان پاشتا ابدۋلازيز ال- ساۋدتىڭ جۇبايى حۋسسا بينت احمەد ال- سۋدايريدىڭ ءارى ساۋد ارابياسىنىڭ قازىرگى پاتشاسى كورول سالماننىڭ شەشەسىنىڭ تۋىسى.

جاستار وتكەن جىلدىڭ قىركۇيەك ايىندا اتاستىرعان بولاتىن. Vogue Arabia باسىلىمى «مۇراگەر حانزادا قورى» ۇيىمداستىرعان فورۋمدا حۋسەين بولاشاق جارىمەن سىنىپتاسى تانىستىرعانىن ايتقانىن جازعان بولاتىن.

«مەن ءوزىمدى باقىتتىمىن دەپ سانايمىن. ويتكەنى، كۇن سايىن رادجۆا سىندى ارۋدى جولىقتىرا بەرمەيسىڭ»، - دەگەن ەدى يورداندىق كرونپرينتس.

فوتو: زاحران سارايى امماننىڭ باتىسىندا 1957 -جىلى سالىنعان بولاتىن. ول حاشيميت اۋلەتىنىڭ رەزيدەنسياسى قىزمەتىن اتقارادى ءارى رەسمي ءىس- شارالار وتكىزىلەتىن ورىن سانالادى. 60 جىل بۇرىن بۇگىندە ومىردەن وزعان پاتشا حۋسەين بين تالال مەن حانشايىم مونا ۇيلەنگەن بولاتىن. سونىمەن قاتار 1993 -جىلى قازىرگى پاتشا، سول كەزدەگى حانزادا ابداللا مەن راني دە نەكەلەسكەن ەدى.

نەكە قيۋ ءراسىمى اياقتالعاننان كەيىن جاس جۇبايلار قىزىل اۆتومبيلدەردەن جاساقتالعان كورتەجگە ءمىنىپ، يوردانيا استاناسى كوشەلەرىمەن ءجۇرىپ ءوتتى. جول تالعامايتىن قىزىل كولىكتەر شەرۋ - بۇل يورداندىق داستۇرلەردىڭ ءبىرى سانالادى. بۇرىندارى ەلدىڭ نەگىزىن قالاعان 1 ابداللا پاتشا ۇستىنە قىزىل مۋندير كيىپ، ءاپپاق جىلقىعا مىنگەن سالت اتتىلاردى ەرتىپ جۇرەتىن ەدى.

بۇگىندە قىزىز كورتەج پارلامەنتتىڭ اشىلۋى، ارميا كۇنى، تۋەلسىزدىك كۇنى جانە مەملەكەت باسشىلارىنىڭ رەسمي ساپارى سىندى ۇلكەن مەملەكەتتىك ماڭىزى بار وقيعالار كەزىندە قولدانىلادى. وسىنداي اتاۋلى كۇندەردە كورتەج مۇشەلەرى، سونىمەن قاتار سالت اتتىلار دا يوردانيا اسكەري فورماسىن، ەلدە «شەماگ» دەپ اتالاتىن قىزىل- اق تورلى باس كيىم كيەدى.

كورتەج اشىق قىزىل ءتۇستى، قارۋلانعان 8 Land Rover اۆتوموبيلىنەن جانە 11 موتوتسيكلدەن تۇرادى. ەرەكشە جاعدايلارعا وعان جىلقى مەن تۇيە مىنگەن سالت اتتىلار قوسىلادى. ال يوردانيا قارۋلى كۇشتەرىنىڭ وركەسترى ۆولىنكا مەن جەرگىلىكتى مۋزىكالىق اسپاپتارمەن اسكەري مۋزىكا وينايدى. وسلايشا، جول تالعامايتىن كولىكتەر مەن موتوتسيكلدەر كورتەجدىڭ نەگىزگى كولىگى توڭىرەگىندە قورعانىس شەبىن قۇرادى.

ۇيلەنۋ تويى قۇرمەتىنە ارنالعان شەرۋ امماننىڭ ورتالىق كوشەلەرىمەن ءوتتى. كوشە بويى جاس جۇبايلاردى كورۋگە ءارى قۇتتىقتاۋعا اسىققان يورداندىقتارعا لىق تولى بولدى. كوشەلەرمەن وتكەن كورتەج ال- حۋسەينيا سارايىنا بارىپ، سول جەردە شامامەن 1700-دەي قوناقتىڭ قاتىسۋىمەن ۇيلەسۋ تويى ءوتتى.

ۇيلەنۋ تويىندا جەرگىلىكتى جانە وڭىرلىك انشىلەر، سونىمەن قاتار حور، يوردان وركەسترى، ۇلتتىق وركەستر جانە ۇلتتىق بي ۇجىمدارى ونەر كورسەتتى.

كورول سارايىنىڭ مالىمدەمەسىنە سايكەس، ۇلەنۋ تويىندا مۇراگەر حانزادانىڭ، ساۋد مۇراگەرىنىڭ اسكەري مانسابىنا جانە ونىڭ قالىڭدىعىنا، ءداستۇرلى يورداندىق ارتىستىككە قۇرمەت كورسەتەتىن ورىنداۋشىلاردىڭ ءارتۇرلى قۇرامى بولعان. ساراي مالىمەتىنشە، بانكەت «مەملەكەتتىك بانكەتتىڭ رەسميلىك جانە ديپلوماتيالىق اسپەكتىلەرى مەن ۇيلەنۋ ءراسىمىنىڭ قۋانىشتى مەرەكەسى مەن ءداستۇرىن بىرىكتىرەدى».

قابىلداۋ ءىس- شاراسى كۇيەۋ جىگىت پەن قالىڭدىقتىڭ ۇيلەنۋ تويىنا ارنالعان تورتتى كەسۋىمەن اياقتالدى.

ايتا كەتەرلىگى، كورولدىك ۇيلەنۋ تويى نەكە قيۋ راسىمىنە دەيىن بىرنەشە كۇن بۇرىن باستالعان مەرەكەلىك ءىس- شارالار تىزبەگىن قۇرايدى. وتكەن اپتادا پاتشايىم رانيا قالىڭدىقتىڭ ءداستۇرلى قوشتاسۋ كەشى - «قىنا ءتۇنىن» ۇيىمداستىرعان بولاتىن. قوشتاسۋ كەشى بارىسىندا قالىڭدىقتىڭ قولىنا قىنامەن جازۋ جازۋ ءراسىمى ءوتتى.

ال ۇيلەنۋ تويى قارساڭىندا 2 ابداللا پاتشا ۇلىنىڭ ۇيلەنۋى قۇرمەتىنە وراي بۇكىل كورولدىكتەگى قوناقتار ءۇشىن تۇسكى قوناقاسىن بەرگەن بولاتىن. شامامەن 40 مىڭ قوناق قاتىسقان قوناقاسى بارىسىندا 2 ابداللا پاتشا مۇراگەر حانزاداعا ادىلدىكتىڭ جانە وتاندى قورعاۋدىڭ نىشانى رەتىندە حاشيميتتەر وتباسى شىققان باني حاشيم تايپاسىنىڭ تاريحي قىلىشىنىڭ دالمە- ءدال كوشىرمەسىن سىيعا تارتتى.

ۇيلەنۋ تويىنىڭ قۇرمەتىنە وراي ەلدە ۇلتتىق مەيرام مەن دەمالىس كۇنى جاريا ەتىلگەن. يوردانيانىڭ بارلىق 12 وڭىرىندە مەرەكەلىك ءىس- شارالار وتكىزىلدى.

اۆتور:

مارلان جيەمباي

سوڭعى جاڭالىقتار