كايردە قۇمدى داۋىل ءتورت ادامنىڭ ءومىرىن قيدى

None
كاير. قازاقپارات - قاتتى قۇمداۋىل بەيسەنبى كۇنى كاير اسپانىن قىزعىلت تۇسكە بوياپ، اۆتوكولىكتەگى وتە ۇلكەن جارناما تاقتاسىن قۇلاتتى. سالدارىنان ءبىر ادام قازا تاۋىپ، بەسەۋى جاراقات الدى.

بۇل تۋرالى قازاقپارات MENA- عا سىلتەمە جاساپ حابالايدى.

كۇن رايىنىڭ قولايسىزدىعىنان ەل استاناسىنىڭ جولدارىندا كەپتەلىس بولدى. بيلىك وكىلدەرى قىزىل تەڭىزدەگى ەكى پورتتى جابۋعا ءماجبۇر بولدى، سەبەبى جەلدىڭ جىلدامدىعى شامامەن 13 م/س، ال تولقىنداردىڭ بيىكتىگى 4 مەترگە جەتتى.

پوليتسيا كايردەگى سەرىكتەس قالادا جارناما تاقتاسى قۇلاپ تاعى ءبىر ادام قازا تاپقانىن حابارلادى.

كايردەن شىعىسقا قاراي ورنالاسقان سۋەتس قالاسىندا تەپە-تەڭدىكتى ساقتاي الماعان جاس جىگىت ءتورتىنشى قاباتتىڭ بالكونىنان قۇلاپ كەتكەن.

ءنىل ساعاسىنداعى مەنۋفيا پروۆينتسياسىندا تاعى ءبىر ەر ادام قۇمداۋىل قۇربانى بولدى. وعان قۇرما پالماسى قۇلاعان.

قۇلاپ تۇسكەن الىپ جارناما تاقتاسى ءنىلدىڭ شىعىس پەن باتىس جاعالاۋىن قوساتىن October 6 كوپىرىنە ورناتىلعان بولاتىن. كوپىردەگى كولىك قوزعالىسى توقتاتىلدى.

ينتەرنەتتە جاريالانعان كادرلاردا الىپ قۇم تولقىنى كايردەن سۋەتسكە قاراي قۇم دالا ارقىلى قوزعالىپ بارا جاتقانى بەينەلەنگەن. ونى كورىپ، ۇرەيلەنگەن كولىك جۇرگىزۋشىلەرى كەرى بۇرىلىپ، قارسى بەتتەگى قوزعالىس جولىنا شىعىپ كەتكەن.

«حاماسين» دەگەن اتپەن تانىلعان قۇمدى داۋىل ەگيپەتتە ادەتتەگى قۇبىلىس سانالادى، ءبىراق مۇنداي ءىرى جايسىز اۋا رايى سيرەك كەزدەسەدى.

قۇمدى داۋىل مەن اپتاپ ىستىق جۇماعا دەيىن جالعاسادى دەگەن بولجام بار.

سوڭعى جاڭالىقتار