عالىمدار الداعى بەس جىلدا اۋا رايى رەكورد دارەجەدە ىسيتىنىن ەسكەرتتى
عالىمدار الداعى بەس جىلدا الەمدە قالىپتى دەڭگەيدەن 1,5 گرادۋس جوعارى تەمپەراتۋرانىڭ جاڭا رەكوردتارى بولادى دەپ ەسەپتەيدى.
بۇل بولجام تىنىق مۇحيتىنىڭ ەكۆاتورلىق بولىگىندەگى كليماتقا ۇلكەن اسەر ەتەتىن ەل- نينو نەمەسە وڭتۇستىك تەربەلىس - سۋ بەتىندەگى تەمپەراتۋرا اۋىتقۋلارىنا نەگىزدەلگەن. مۇحيت بەتىندەگى جىلى سۋدىڭ اۋدانى شىعىسقا قاراي جىلجيدى، دەپ جازادى Reuters.
2015-جىلى پاريجدە قول قويىلعان كليمات كەلىسىمىنە سايكەس، الەم ەلدەرى يندۋستريالاندىرۋ كەزەڭىمەن سالىستىرعاندا جاھاندىق تەمپەراتۋرانى 1,5 گرادۋس ارتتىرماۋعا كەلىسكەن بولاتىن. عالىمداردىڭ ايتۋىنشا، بۇل شەكتەن اسىپ كەتۋ اپاتتى جانە قايتىمسىز زارداپتارعا اكەلۋى مۇمكىن.
دۇنيەجۇزىلىك مەتەورولوگيالىق ۇيىمنىڭ باس حاتشىسى، پروفەسسور پەتتەري تاالاستىڭ ايتۋىنشا، بۇل تەمپەراتۋرانىڭ تۇراقتى تۇردە 1,5 گرادۋس كوتەرىلۋىن بىلدىرمەيدى. ءبىراق بۇل شەكتەۋدى جيىرەك بۇزۋعا تۋرا كەلەدى. جاھاندىق ورتاشا تەمپەراتۋرا بۇرىن ەشقاشان 1,5 گرادۋستان اسپاعان، ونەركاسىپتىك كەزەڭگە دەيىنگى كەزەڭمەن سالىستىرعاندا شىڭى 1,28+ گرادۋس بولدى.
دۇنيەجۇزىلىك مەتەورولوگيالىق ۇيىمنىڭ ەسەبىندە 2023 جانە 2027-جىلدار ارالىعىنداعى جىلدىڭ بىرىندە 1,5 گرادۋس شەگىنەن اسىپ كەتۋ ىقتيمالدىعى 66 پايىز ەكەنىن ەسكەرتەدى.
ەل-نينو قۇبىلىسىن العاش رەت پەرۋ بالىقشىلارى انىقتادى. پەرۋ جاعالاۋىندا ول روجدەستۆو قارساڭىندا شىڭىنا جەتكەن.
رەكورد تەمپەراتۋرا كوپتەگەن ەل ءۇشىن، سونىڭ ىشىندە وڭتۇستىك ازيا ءۇشىن ۇلكەن قيىندىقتار تۋعىزادى. عالىمداردىڭ پىكىرىنشە، تەمپەراتۋرانىڭ 1,8 گرادۋس جوعارىلاۋى اسىرەسە اۋىل شارۋاشىلىعىندا ۇلكەن قاۋىپ-قاتەر تۋعىزادى.
دۇنيەجۇزىلىك دەنساۋلىق ساقتاۋ ۇيىمىنىڭ ساراپشىلارى تەمپەراتۋرانىڭ كوتەرىلۋى ادام دەنساۋلىعىنا، ازىق-تۇلىك قاۋىپسىزدىگىنە جانە قورشاعان ورتاعا اۋىر زارداپتار اكەلەتىنىن ەسكەرتتى.
ولار كليماتقا بايلانىستى اپاتتار سانىنىڭ كەيىنگى 50 جىلدا بەس ەسە وسكەنىنە الاڭداۋلى.