جاستىق شاقتىڭ قاتەلىگى اتتى پوەتيكالىق دەرەكتى فيلم ءتۇسىرىلىپ جاتىر
بۇل - ءتاڭىرى مەن اسپاننىڭ بەينەسىن جاڭعىرتۋ تۋرالى پوەتيكالىق دەرەكتى فيلم. تۋىندى ۇلتتىق كينونى قولداۋ مەملەكەتتىك ورتالىعىنىڭ كومەگىمەن ءتۇسىرىلىپ جاتىر، دەپ حابارلايدى قازاقپارات.
قازىرگى ۋاقىتتا ءتۇسىرىلىم توبى الماتى وبلىسىنىڭ قاراساي اۋدانىنداعى ءۇشقوڭىر ۇستىرتىندە جۇمىس ىستەپ جاتىر.
كارتينانىڭ ءتۇسىرىلىمى مامىر ايىنان ماۋسىمنىڭ ورتاسىنا دەيىن جالعاسادى.
جۇمىستىڭ ءبىرىنشى جانە ەڭ قيىن بولىگى يوردانيادا، ايگىلى پەترا قالاسىندا ءوتتى.
كارتينانىڭ پروديۋسەرى ايگۇل چەرەندينوۆانىڭ ايتۋىنشا، فيلمنىڭ بۇكىل نەگىزگى كورىنىستەرى ءتۇسىرىلىپ ءبىتتى، تەك ناتۋرا جانە دەرەكتى كادرلار، سونداي-اق پاۆيلوندا بىرنەشە ءتۇسىرىلىم جۇمىستارى قالدى.
«باقىت عافۋ ۇلى - نەگىزىنەن قازاق سالت-داستۇرلەرىن ءتۇسىندىرۋ مامانى. بۇل فيلمدە ءوزىمىز بەن ەڭ كونە شۋمەر مادەنيەتى اراسىنداعى جاھاندىق بايلانىستى كورەمىز. بۇل جايىندا ولجاس سۇلەيمەنوۆ ءوزىنىڭ «شۋمەرنامە» كىتابىندا ايتىپ كەتكەن. رەجيسسەر سۇلەيمەنوۆتىڭ پروزالىق شىعارماشىلىعىن قايتا قاراستىرىپ، سالت-ءداستۇر پوەتيكاسىن جەتكىزۋگە جانە كورنەكى بەينەلەر ارقىلى قازاقتاردىڭ ميفولوگيالىق ساناسىن قايتا جاڭعىرتۋعا ۇمتىلادى»، - دەپ اتاپ ءوتتى پروديۋسەر.
اۆتورلار ۇلكەن پروكاتقا شىعۋعا ءۇمىتتى، سونىمەن قاتار حالىقارالىق كينوفەستيۆالدەردە تۋىندىلاردى ىلگەرىلەتۋگە ماماندانعان كومپانيامەن ىنتىماقتاستىقتى جوسپارلاپ وتىر.
«ءبىر جاعىنان، بۇل فيلمدە اشىلعان تاقىرىپ ەڭ الدىمەن ءوزىمىز ءۇشىن ماڭىزدى ەكەنى انىق. بۇل - قازاقتىڭ دۇنيەتانىمى. بىزگە ءوزىمىزدى تانۋ فيلمدى شەتەلدىكتەرگە كورسەتۋدەن ماڭىزدى»، - دەپ قورىتىندىلادى ا. چەرەندينوۆا.