قازاقستانعا تانىمال بوكسشى مەنني پاكياو كەلۋى مۇمكىن
بۇگىن ق ر مادەنيەت جانە سپورت ۆيتسە-ءمينيسترى ەرجان ەركىنبايەۆ شري-لانكا دەموكراتيالىق رەسپۋبليكاسىنىڭ ەلشىسى جانيتا ليانگە جانە فيليپپين رەسپۋبليكاسىنىڭ ەلشىسى يگور بايلەنمەن كەزدەستى.
كەزدەسۋ «Kazakh Tourism ۇ ك» ا ق كەڭسەسىندە ءوتتى، ەرجان ەركىنبايەۆ ەلشىلەرمەن تۋريزم، سپورت جانە مادەنيەت سالاسىنداعى ىنتىماقتاستىقتى تالقىلادى.
سونداي- اق كەزدەسۋ اياسىندا «Kazakh Tourism ۇ ك» ا ق باسقارما ءتوراعاسى تالعات امانبايەۆ شەتەلدىك ديپلوماتتارعا قازاقستاننىڭ تۋريستىك الەۋەتى جانە ەلدەگى وسى سالانىڭ نەگىزگى دامۋ ۇردىستەرى تۋرالى ايتىپ بەردى.
ەلشى بايلەن الەمگە ايگىلى كاسىبي بوكسشى مەنني پاكياونىڭ قازاقستانعا كەلۋ ماسەلەسىن قاراستىرۋدى ۇسىندى. سونداي-اق، بايلەن مىرزا جاقىن ارادا قازاقستاننىڭ بارلىق وڭىرلەرىنە، ونىڭ ىشىندە الماتىعا بارىپ، ەلىمىزدىڭ مادەنيەتىمەن تانىسىپ، الىپ شاھاردىڭ تۋريستىك الەۋەتىن زەردەلەۋگە نيەت ءبىلدىردى.