ەلەنا رىباكينا ءوزىنىڭ جەكە رەكوردىن جاڭارتتى

استانا. قازاقپارات - قازاقستاننىڭ ءبىرىنشى، الەمنىڭ 4-راكەتكاسى ەلەنا رىباكينا ءوزىنىڭ جەكە رەكوردىن جاڭارتتى، - دەپ حابارلايدى Vesti.kz.

OptaAce مالىمەتىنشە، رىباكينا 2023-جىلى بيللي جين كينگ كۋبوگىن ەسەپتەمەگەندە، بۇگىن ءوزىنىڭ 30-جەڭىسىنە قول جەتكىزدى. رىباكينا بىلتىر جىل بويى 37 رەت جەڭىسكە جەتكەن.

سونىمەن بىرگە قازاقستاندىق تەننيسشى ەلەنا رىباكينا «رولان گارروستىڭ» ەكىنشى راۋندىنداعى ءساتتى ونەرىنەن كەيىن ءوزىنىڭ جەڭىس سەرياسىن ۇزارتتى.

وسىلايشا، بيللي جين كينگ كۋبوگىن قوسا العاندا، رىباكينا 2023-جىلى توپىراق توسەنىشىندە 11 ماتچتا جەڭىسكە جەتتى، بۇل - ونىڭ ءبىر ماۋسىمداعى ەڭ جوعارى كورسەتكىشى.

ەسكە سالايىق، ەلەنا رىباكينا «ۇلكەن دۋلىعا» ساناتىنا ەنەتىن «روللان گارروس» تۋرنيرىنىڭ ەكىنشى اينالىمىندا چەحيالىق ليندا نوسكوۆانى جەڭدى. ەندى ونىڭ ءۇشىنشى اينالىمىنداعى قارسىلاسى يسپانيالىق سارا سورريبەس تورمو بولادى. ماتچ 3- ماۋسىمعا جوسپارلانعان.