قازاقستانداعى بۇكىل ءبىلىم باسقارمالارى ءبىر اي بويى تەكسەرىلەدى
وقۋ-اعارتۋ مينيسترلىگى جەرگىلىكتى اتقارۋشى ورگانداردىڭ ءبىلىم سالاسىنداعى قىزمەتىن ۇيلەستىرۋ مەن ادىستەمەلىك باسشىلىقتى جۇزەگە اسىرۋ ماقساتىندا 5- ماۋسىم مەن 5- شىلدە ارالىعىندا ءبىلىم باسقارمالارىنىڭ قىزمەتىنە كەشەندى زەردەلەۋ جۇرگىزەدى.
زەردەلەۋ تەك ءبىلىم باسقارمالارىنىڭ جۇمىسىن قامتيدى، سايكەسىنشە بالاباقشالارعا، مەكتەپتەرگە، كوللەدجدەرگە جانە باسقا دا ءبىلىم بەرۋ ۇيىمدارىنا بارمايدى.
زەردەلەۋدىڭ نەگىزگى ماقساتى - ءبىلىم بەرۋ جۇيەسىنىڭ دامۋىن تەجەۋشى فاكتورلاردى جانە ۇزدىك وڭىرلىك تاجىريبەنى انىقتاۋ. سونداي-اق زەردەلەۋ بارىسىندا مينيسترلىكتىڭ كوميتەتتەرى مەن دەپارتامەنتتەرىنىڭ ماماندارى جانە ونىڭ ۆەدومستۆولىق باعىنىستى ۇيىمدارىنىڭ قىزمەتكەرلەرى ادىستەمەلىك كومەك كورسەتەدى. زەردەلەۋ جۇرگىزۋ ءۇشىن وڭىرلىك باسقارمالار قىزمەتىنىڭ بارلىق باعىتتارىن قامتيتىن ارنايى ولشەمشارتتار ازىرلەندى.
ءىس-شارانىڭ قورىتىندىسى بويىنشا وڭىرلەردىڭ ءبىلىم بەرۋ جۇيەسىن جەتىلدىرۋ جانە ولاردىڭ قىزمەتىنىڭ تيىمدىلىگىن ارتتىرۋ جونىندە ۇسىنىمدار بەرىلەدى.
«ءبىلىم باسقارمالارىن زەردەلەۋگە مۇعالىمدەر نەمەسە ءبىلىم بەرۋ ۇيىمدارىنىڭ باسشىلارى تارتىلماۋى ءتيىس ەكەنىن تاعى دا ەسكە سالعىم كەلەدى. ءبىلىم بەرۋ ۇيىمدارى ءۇشىن جازعى دەمالىس ۋاقىتى باستالدى، مۇعالىمدەر بەكىتىلگەن كەستەگە سايكەس كەزەكتى دەمالىسقا شىعادى. قورىتىندى ەمتيحانداردان كەيىن دە پەداگوگتەردىڭ زاڭدى ەڭبەك دەمالىسىنا شىعۋىنا ەشبىر كەدەرگى بولماۋى كەرەك. ءبىلىم سالاسىندا ساپانى قامتاماسىز ەتۋ كوميتەتى بارلىق پەداگوگتەرگە 2022-2023 وقۋ جىلى ىشىندە اتقارعان جۇمىسى ءۇشىن العىس ايتادى» دەيدى كوميتەت باسشىسى.