مەملەكەت باسشىسى الماتى قالاسىنىڭ قوعامدىق كولىك جۇيەسىمەن تانىستى
مەملەكەت باسشىسىنا قوعامدىق كولىكتەردە ەلەكتروندى تولەم جۇيەسىن ەنگىزۋ جانە بۇكىل ۇدەرىستى اۆتوماتتاندىرۋ ناتيجەسىندە جولاۋشى تاسىمالى سالاسىندا كولەڭكەلى اقشا اينالىمى ايتارلىقتاي ازايىپ، كولىك كاسىپورىندارىنىڭ تابىسى بىرنەشە ەسە ارتقانى جونىندە باياندالدى.
2016-2022-جىلدارى اتالعان سالانىڭ جىلدىق قارجى اينالىمى 2,7 ەسە، ياعني 10 ميلليارد تەڭگەدەن 26,8 ميلليارد تەڭگەگە دەيىن ءوستى. وسى جىلدارى قوعامدىق كولىكتەردىڭ سانى مەن ساپاسى ارتتى. سونىمەن قاتار قوعامدىق كولىكتەردىڭ ۋاقىت ءتارتىبىن ساقتاۋى 95 پايىزعا دەيىن جەتكەن.
پرەزيدەنت دامىعان قوعامدىق كولىك جۇيەسى ساپالى قالا تىرشىلىگىنىڭ اجىراماس بولىگى ەكەنىن اتاپ ءوتتى. قاسىم-جومارت توقايەۆ وسى سالانى ودان ءارى رەفورمالاۋدىڭ ماڭىزدىلىعىنا، جولاۋشىلار تاسىمالىنىڭ ساپاسى مەن جايلىلىعىن ۇنەمى جەتىلدىرۋ قاجەتتىلىگىنە نازار اۋداردى.
كومپانيا باسشىلىعىنىڭ ايتۋىنشا، الماتى مەن ونىڭ ماڭىنداعى اۋماقتارداعى ادامداردىڭ كەلىپ-كەتۋىنە جۇرگىزىلگەن تالداۋ ناتيجەسىندە ءتيىمدى كولىك جۇيەسى قالىپتاسادى. ونىڭ دەرەكتەرى باعدارلىق جەلىنى وڭتايلاندىرۋ كەزىندە ەسكەرىلەدى.
«الماتى قالاسىنىڭ كولىك حولدينگى» ج ش س قوعامدىق كولىكتى باسقارۋ سالاسىنداعى تاجىريبەسىن باسقا باعىتتاردا دا بەلسەندى قولدانادى. اتاپ ايتقاندا، كومپانيا 15 سانات بويىنشا جەڭىلدىكپەن جول جۇرۋگە قۇقىعى بار ازاماتتاردىڭ الەۋمەتتىك ساناتتارىن، سونىڭ ىشىندە ولاردىڭ ءجۇرىپ-تۇرۋ باعىتتارىن تولىق سيفرلاندىردى. قازىرگى ۋاقىتتا وسى دەرەكتەر نەگىزىندە اتاۋلى الەۋمەتتىك كومەكتىڭ ماقساتتى تۇردە جۇمسالۋىن قامتاماسىز ەتۋ ءۇشىن جوبالار ازىرلەنىپ جاتىر. بۇدان بولەك، كومپانيانىڭ ديسپەتچەرلىك باسقارۋ ورتالىعى ينۆاتاكسي ماشينالارى مەن كوممۋنالدىق ارناۋلى تەحنيكالاردىڭ قوزعالىسىنا مونيتورينگ جۇرگىزەدى.
