كاسپي تەڭىزىنىڭ اقتاۋداعى جاعالاۋىنىڭ ءبىر بولىگى قارا تۇسكە بويالدى
ماڭعىستاۋ وبلىستىق ەكولوگيا دەپارتامەنتى تەڭىز سۋىنىڭ وزگەرۋىنە قاتىستى تۇسىنىك بەردى، دەپ حابارلايدى قازاقپارات ءتىلشىسى.
دەپارتامەنت ماماندارى 4- شاعىن اۋدانى تەڭىز جاعالاۋىنىڭ قارا تۇسكە ەنۋىنە بايلانىستى تەكسەرۋ جۇمىستارىن جۇرگىزگەن.
«اتالعان دەرەك بويىنشا دەپارتامەنت ماماندارى تەڭىز جاعالاۋىنا شولۋ جۇمىستارىن جۇرگىزدى. شولۋ بارىسىندا اتالعان اۋماقتا تابيعي قۇبىلىستار ناتيجەسىندە جىلدار بويى جينالعان، ءولى بالدىرلاردىڭ ءشىرۋى مەن تەڭىز ءتۇبى لايىنىڭ (يلوۆىە وسادكي) جوعارى كوتەرىلۋى سالدارىنان تەڭىز ءتۇسى وزگەرىسكە ۇشىراعانى انىقتالدى»، - دەپ ءمالىم ەتتى ماڭعىستاۋ وبلىستىق ەكولوگيا دەپارتامەنتىنىڭ باسپا ءسوز قىزمەتىنەن.
ماماندار قازىر 4- شاعىن اۋدانىنداعى تەڭىز جاعالاۋىن ءىرى تەحنيكانىڭ كومەگىمەن تازالاۋ جۇمىستارىن جۇرگىزۋ ءۇشىن وبلىس اكىمشىلىگىنە تازالىق جۇمىستارىن ۇيىمداستىرۋدى سۇراپ، حات جولدادى.