بالالار ۇيلەرى وتكەننىڭ ەنشىسىندە قالۋى كەرەك - ءاليحان سمايىلوۆ
ۇكىمەت باسشىسى وسىندا تۇراتىن بالالارمەن تىلدەسىپ، ولاردىڭ تۇرمىسى مەن وقۋ جاعدايمەن تانىستى. پرەمەر-مينيسترگە وقۋ كابينەتتەرى، ويىن الاڭى، جاتىن بولمەلەر مەن اسحانا كورسەتىلدى، سونداي-اق بالالارمەن جۇرگىزىلىپ جاتقان جۇمىستار جانە ولاردى مەكتەپتەن كەيىنگى قولداۋ شارالارى تۋرالى ايتىلدى.
ءاليحان سمايىلوۆ ورتالىق تاربيەلەنۋشىلەرىن حالىقارالىق بالالاردى قورعاۋ كۇنىمەن قۇتتىقتادى.
«بۇل - ءبىز ءۇشىن ەرەكشە مەرەكە، ويتكەنى بالالار - ءبىزدىڭ بولاشاعىمىز! بالالاردىڭ دەنى ساۋ، اقىلدى جانە تابىستى بولىپ ەر جەتىپ، ساپالى ءبىلىم العانىن قالايمىز. ال مەملەكەت بۇل ءۇشىن بارلىق قاجەتتى جاعدايدى جاساۋدى جالعاستىرماق»، — دەدى پرەمەر-مينيستر.
ۇكىمەت باسشىسى ەل پرەزيدەنتى جەتىم بالالاردى الەۋمەتتىك قورعاۋ جانە ولاردى وتباسىندا تاربيەلەۋ ماسەلەلەرىنە ەرەكشە نازار اۋداراتىنىن اتاپ ءوتتى. سوڭعى 10 جىلدا رەسپۋبليكاداعى بالالار ۇيلەرىنىڭ سانى %41 عا، ال ونداعى بالالار سانى %65 عا تومەندەدى. بۇگىنگى تاڭدا ەلدە 3700 گە جۋىق بالا تۇراتىن وسىنداي 116 مەكەمە بار.
«ءبىز ءار بالانىڭ وتباسىندا تاربيەلەنگەنىن قالايمىز. سوندىقتان جىل سوڭىنا دەيىن كاسىبي اسىراپ الۋشى وتباسىلار ينستيتۋتىن ەنگىزۋ بويىنشا زاڭنامالىق نورمالار قابىلداناتىن بولادى. ءبىز بارلىق بالا وتباسىندا تاربيەلەنۋى كەرەك دەگەن ماقسات قويىپ وتىرمىز. سول كەزدە بالالار ۇيلەرىنىڭ قاجەتى دە بولماي قالادى»، - دەدى ءاليحان سمايىلوۆ.
9-سىنىپ وقۋشىسى نادەجدا مالاحوۆا پرەمەر-مينيسترگە ورتالىق تاربيەلەنۋشىلەرى سالعان سۋرەتتى سىيلادى. ال بالالارعا ءتاتتى سىيلىقتار، ۆەلوسيپەدتەر مەن ساموكاتتار تارتۋ ەتىلدى.
ءاليحان سمايىلوۆ ورتالىقتا تاربيەشى بولىپ جۇمىس ىستەيتىن مەكەمە تۇلەكتەرى گۇلزات گازەيەۆا جانە ماريا زاحاروۆامەن، سونداي-اق قازاقستاننىڭ بالالار ۇيلەرى تۇلەكتەرى قاۋىمداستىعىنىڭ باسشىسى رافاەل گاسانوۆ جانە ورتالىق ديرەكتورى بيبىگۇل تاكيسوۆامەن اڭگىمەلەستى.
ۇكىمەت باسشىسى جەتىم جانە اتا-اناسىنىڭ قامقورلىعىنسىز قالعان بالالارعا قاتىستى سۇراقتارعا ەگجەي-تەگجەيلى جاۋاپ بەردى. اتاپ ايتقاندا، ولاردى باسپانامەن قامتۋ جانە ءبىلىم بەرۋ شارالارى تۋرالى ءسوز قوزعادى.
پرەمەر-ءمينيستردىڭ ايتۋىنشا، بۇگىندە وسى ساناتتاعى بالالاردىڭ ءبىرىنشى كەزەكتە ءۇي الۋعا قۇقىعى بار. كوممۋنالدىق تۇرعىن ءۇي قورىنان نەمەسە اكىمدىكتەردىڭ جەكە تۇرعىن ءۇي قورىنان جالعا الىنعان ۇيلەردىڭ كەمىندە% 20 زاڭدى تۇردە وسىنداي ساناتتاعى بالالارعا بولىنەدى.
«بيىل رەسپۋبليكالىق بيۋجەتتەن حالىقتىڭ الەۋمەتتىك وسال توپتارى ءۇشىن جالعا بەرىلەتىن پاتەرلەردى ساتىپ الۋعا 100 ميلليارد تەڭگەدەن استام قارجى ءبولىندى. بۇل قاراجاتتىڭ كەم دەگەندە %20 جەتىم جانە اتا-اناسىنىڭ قامقورلىعىنسىز قالعان بالالارعا بەرىلەدى. سونىمەن قاتار ءار وڭىردە بيۋجەتتەن تىس جانە دەمەۋشىلەر قولداۋى ەسەبىنەن تۇرعىن ۇيمەن قامتاماسىز ەتۋ جونىندەگى شارالار كوزدەلگەن وسى ساناتتاعى بالالاردى قولداۋ جونىندەگى كەشەندى جوسپارلار بار»، - دەدى ءاليحان سمايىلوۆ.
سونىمەن قاتار پرەمەر-مينيستر الەۋمەتتىك وسال ساناتتاعى بالالار ءۇشىن وقۋعا كۆوتا كوزدەلگەنىن اتاپ ءوتتى، بۇگىندە ول بەكىتىلگەن مەملەكەتتىك ءبىلىم بەرۋ تاپسىرىسىنىڭ %1 قۇرايدى. تاجىريبە كورسەتكەندەي، بۇل جەتكىلىكتى كولەم، الايدا ۇكىمەت قاجەت بولعان جاعدايدا ونىڭ مولشەرىن قايتا قاراۋعا دايىن.
اڭگىمە بارىسىندا ورتالىق ديرەكتورى بيبىگۇل تاكيسوۆا پرەمەر-مينيسترگە مەكەمە اۋماعىندا سپورت الاڭىن سالۋعا جاردەمدەسۋ تۋرالى ءوتىنىش ايتتى. ءاليحان سمايىلوۆ قالا اكىمى جەڭىس قاسىمبەككە وسى ماسەلەنى قىسقا مەرزىمدە شەشۋدى تاپسىردى.
بۇگىنگى تاڭدا ورتالىقتا ءۇش جاستان 18 جاسقا دەيىنگى 66 بالا تۇرادى، ونىڭ ىشىندە 28 جەتىم بالا بار.