پرەزيدەنت كورەيا رەسپۋبليكاسىنىڭ سىرتقى ىستەر ءمينيسترى پاك چجيندى قابىلدادى

None
استانا. قازاقپارات - مەملەكەت باسشىسى قاسىم-جومارت توقايەۆ قازاقستانعا رەسمي ساپارمەن كەلگەن كورەيا رەسپۋبليكاسىنىڭ سىرتقى ىستەر ءمينيسترى پاك چجيندى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

اڭگىمەلەسۋ بارىسىندا قاسىم-جومارت توقايەۆ پەن پاك چجين ەكىجاقتى ستراتەگيالىق سەرىكتەستىكتىڭ قازىرگى جاي-كۇيى مەن دامۋ پەرسپەكتيۆالارى جونىندە پىكىر الماستى.

مەملەكەت باسشىسى قازاقستان مەن كورەيا اراسىنداعى ساۋدا، ينۆەستيتسيا جانە تەحنولوگيا سالالارىنداعى ءوزارا قارىم-قاتىناستاردىڭ، سونداي-اق مادەني-گۋمانيتارلىق بايلانىستاردىڭ قارقىندى دامىپ كەلە جاتقانىن اتاپ ءوتتى.

photo

- وزدەرىڭىزگە ءمالىم، كورەيا ءبىز ءۇشىن ازياداعى نەگىزگى سەرىكتەستەردىڭ ءبىرى رەتىندە وتە ماڭىزدى. ەكىجاقتى ىنتىماقتاستىق باعىتىنداعى بارلىق جەتىستىكتى جوعارى باعالايمىز. سونىمەن قاتار ەكىجاقتى ساۋدا كولەمى 6 ميلليارد دوللاردان اسقانىنا وتە قۋانىشتىمىن. دەگەنمەن بىزدە مول مۇمكىندىك بار. ونى بولاشاقتا پايدالانۋ قاجەت. سوندىقتان ءسىزدىڭ بۇل ساپارىڭىز - وزەكتى حالىقارالىق ماسەلەلەر جونىندە ءوزارا پىكىر الماسۋ ءۇشىن جاقسى مۇمكىندىك. قازاقستان مەن كورەيانىڭ نەگىزگى حالىقارالىق ماسەلەلەر بويىنشا ۇستانىمدارى ورتاق. حالىقارالىق ارەنادا دا، ەكىجاقتى فورماتتا دا ءبىزدى جاقىنداتا تۇسەتىن كوپتەگەن ورتاق ىستەرىمىز بار دەپ سەنەمىن، - دەدى مەملەكەت باسشىسى.

photo

مەملەكەت باسشىسى KIA اۆتوموبيل ءوندىرىسىن، Hyundai زاۋىتىنىڭ جۇمىسىن، فەرروقورىتپا جانە بولات ءوندىرىسىن، «اقىلدى فەرما» جوباسىن جانە باسقا دا باستامالاردى مىسالعا كەلتىردى. سونىمەن قاتار پرەزيدەنت ەلدەرىمىز اراسىندا ەكىجاقتى قارىم-قاتىناستىڭ بەرىك ينستيتۋتتىق جەلىسى قالىپتاسقانىنا نازار اۋداردى. ساۋدا-ەكونوميكالىق، عىلىمي-تەحنيكالىق ىنتىماقتاستىق جونىندەگى قازاق-كورەي ۇكىمەتارالىق كوميسسياسى مەن ىسكەرلىك كەڭەس وسى بايلانىستارعا دانەكەر بولىپ وتىر. بۇل رەتتە مەملەكەت باسشىسى اتالعان قۇرىلىمداردىڭ الەۋەتىن تولىق پايدالانۋعا شاقىردى.

ءوز كەزەگىندە وڭتۇستىك كورەيا ديپلوماتى قاسىم-جومارت توقايەۆقا ەل پرەزيدەنتى يۋن سوك ەلدىڭ سالەمىن جەتكىزدى جانە قازاقستانمەن ەكىجاقتى جانە ايماقتىق نەگىزدەگى سەرىكتەستىكتى ودان ءارى تەرەڭدەتۋگە دايىن ەكەنىن راستادى.

photo

- ءسىزدىڭ كورەگەن باسشىلىعىڭىزبەن قازاقستان وسى ورنىقتى ەكونوميكالىق ءوسىمدى جالعاستىرادى دەپ سەنەمىن. سونىمەن قاتار ءبىز قازاقستاندا جۇرگىزىلىپ جاتقان رەفورمالاردى جانە زاڭ نورمالارى مەن دەموكراتيالىق قۇندىلىقتاردى نىعايتۋ جونىندەگى ءسىزدىڭ جەكە كۇش-جىگەرىڭىزدى قولدايمىز. 1992-جىلى ديپلوماتيالىق قاتىناس ورناعاننان بەرى ەكىجاقتى سەرىكتەستىگىمىز دايەكتى دامىپ كەلەدى. اسىرەسە 2009-جىلى ستراتەگيالىق سەرىكتەستىك تۋرالى شارتقا قول قويىلعاننان كەيىن قارقىندى دامي ءتۇستى. وسىعان بايلانىستى قارىم-قاتىناسىمىزدى نىعايتۋ ءۇشىن ودان ءارى ىلگەرىلەۋدى جالعاستىرامىز. ءبىز تەك ءداستۇرلى سالادا عانا ەمەس، سيفرلىق تەحنولوگيالار، دەنساۋلىق ساقتاۋ، ەنەرگەتيكا جانە قورشاعان ورتانى قورعاۋ سەكىلدى جاڭا سالالاردا دا تىعىز سەرىكتەستىكتى دامىتىپ جاتىرمىز. ەكى ەل اراسىنداعى بەلسەندى ديپلوماتيا - ەكىجاقتى قاتىناستاردى دامىتۋدىڭ قوزعاۋشى كۇشى، - دەدى پاك چجين.

كەزدەسۋ بارىسىندا جاھاندىق جانە ايماقتىق كۇن تارتىبىنە، حالىقارالىق قۇرىلىمدار اياسىنداعى ءوزارا قارىم-قاتىناسقا قاتىستى وزەكتى ماسەلەلەر قاراستىرىلدى.

سوڭعى جاڭالىقتار