ەلىمىزدە جاسالعان كولىكتەردىڭ قىمباتتاۋىنا نە سەبەپ

استانا. قازاقپارات - ماشينا جاسايتىن وتاندىق كاسىپورىنداردا قولدانىلاتىن توزعان تەحنيكا ءوندىرىس تيىمدىلىگىن تومەندەتىپ، كولىك باعاسىنىڭ قىمباتتاۋىنا اكەلەدى.

بۇل تۋرالى اشىق ن ق ا پورتالىندا جاريالانعان ماشينا جاساۋ سالاسىن دامىتۋدىڭ 4 جىلدىق كەشەندى جوسپارىندا ايتىلعان، دەپ حابارلايدى قازاقپارات ءتىلشىسى.

«ماشينا جاساۋ سالاسىنداعى جابدىقتاردىڭ %37-40 توزعان. ياعني، ولار جاڭعىرتۋدى نەمەسە جوندەۋدى تالاپ ەتەدى. الايدا، بۇل بانكتىك نەسيەلەۋدىڭ جوعارى ستاۆكالارىنا، كاسىپورىنداردىڭ قايتا نەسيەلەنۋىنە، كەپىل بازاسىنىڭ بولماۋىنا بايلانىستى كۇردەلەنىپ وتىر»، - دەپ جازىلعان قۇجاتتا.

كەشەندى جوسپاردا كورسەتىلگەندەي، توزعان تەحنيكانى پايدالانۋ كەسىرىنەن شىعىندار ءوسىپ وتىر. تيىسىنشە ول ءوندىرىس تيىمدىلىگىن تومەندەتەدى جانە كولىك باعاسىنىڭ قىمباتتاۋىنا اكەلەدى.

«ءبىرىنشى كەزەكتە شاعىن جانە ورتا بيزنەستى، ونىڭ ىشىندە «ونەركاسىپتى دامىتۋ» قورىنىڭ جەلىسى بويىنشا وتاندىق وندىرىستەردى دامىتۋ جانە جاڭا وندىرىستەر قۇرۋ ءۇشىن باسىم جانە قولجەتىمدى قارجىلاندىرۋدى قامتاماسىز ەتۋ ماسەلەسى وزەكتى بولىپ قالۋدا. سونداي-اق، سالانىڭ دامۋىنا ۇلتتىق ۆاليۋتا باعامىنىڭ قۇبىلمالى بولۋى قىسىم تۇسىرەدى. بۇل - وتاندىق ءونىم وندىرىسىندە پايدالانىلاتىن ارالىق تاۋارلار مەن جابدىقتار يمپورتىنىڭ قىمباتتاۋىنا اسەر ەتەدى»، - دەلىنگەن جوسپاردا.

بۇعان دەيىن حابارلاعانىمىزداي، قازاقستانداعى ماشينا جاساۋ سالاسىن دامىتۋدىڭ 2024-2028-جىلدارعا ارنالعان كەشەندى جوسپارى بەكىتىلمەك.