ماڭعىستاۋ وبلىسىنداعى اۋىل مەكتەبىن ەكى-اق تۇلەك ءبىتىردى

اقتاۋ. قازاقپارات - ماڭعىستاۋ وبلىسىنىڭ بەينەۋ اۋدانىنا قاراستى سارعا اۋىلىنداعى بەينەۋ مەكتەپ-ينتەرناتىن ەكى-اق تۇلەك ءبىتىردى. ويتكەنى مەكتەپتە وقۋشى سانى از، دەپ حابارلايدى قازاقپارات ءتىلشىسى.

بيىل ماڭعىستاۋ وبلىسىندا 7439 وقۋشى مەكتەپ ءبىتىردى. وبلىس بويىنشا ەڭ كوپ مەكتەپ تۇلەگى مۇنايلى اۋدانىندا تىركەلگەن. اتامەكەن اۋىلىنداعى 7№ مەكتەپتى 117 تۇلەك ءبىتىردى. مۇعالىمدەردىڭ ايتۋىنشا، مۇندا التى 11-سىنىپ بولعان.

ال بەينەۋ اۋدانىنداعى سارعا اۋىلىندا 11-سىنىپتى تەك ەكى قىز بالا اياقتادى.

«بيىل سارعا اۋىلىنداعى بەينەۋ مەكتەپ- ينتەرناتىنان 2 تۇلەك ءبىتىردى. بىلتىر وسى سىنىپتا كورشى اۋىلدان ەكى ەر بالا كەلىپ وقىعان ەدى. الايدا 11-سىنىپقا كوشەتىن ۋاقىتتا ولار كەتىپ قالدى. سەبەبى دەنە تاربيەسى سەكىلدى ساباقتار ەر بالالار ءۇشىن قىزىقسىز بولدى. بەينەۋ مەكتەپ-ينتەرناتىندا 104 وقۋشى بار. ونىڭ 50 ءى ينتەرناتتا جاتادى. وقۋشىلارعا 29 مۇعالىم ساباق بەرەدى. بىزدە 11-سىنىپقا دەيىن وقۋشىلار ىرىكتەلىپ، تەك ەكەۋى عانا قالدى. كوبى 9-سىنىپتان كەيىن كوللەدجگە ءتۇستى. بيىلعى تۇلەكتەر الدا وزدەرى قالاعان وقۋ ورنىنا تۇسەمىز دەپ وتىر»، - دەيدى مەكتەپ ديرەكتورى ايسا ساعىندىقوۆ.